«Белсат» падводзіць вынікі 852-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 24 чэрвеня чытайце ў нашым аглядзе.
На поўначы Харкаўскай вобласці працягваюцца баявыя дзеянні на двух участках фронту – у ваколіцах сяла Глыбокае і на тэрыторыі гораду Ваўчанск і ягоных ваколіцаў (у Харкаўскім і Чугуеўскім раёнах адпаведна). Прарасейскія крыніцы пішуць, што ўкраінскія вайскоўцы адзначаюцца большай актыўнасцю, імкнучыся адкінуць праціўніка да дзяржаўнай мяжы, але агулам баі маюць сустрэчы характар.
У Генеральным штабе Збройных сілаў Украіны паведамілі, што на купянскім і ліманскім кірунках Сілы абароны краіны адбілі шэраг атак праціўніка ў ваколіцах населеных пунктаў Стэльмахаўка, Капанкі, Грэкаўка, Макееўка, Неўскае, Торскае, а таксама на тэрыторыі Серабранскага лясніцтва.
Праўкраінскі тэлеграм-канал «Офіцер» піша, што расейцы наступаюць з ваколіцаў сяла Бераставое, імкнучыся зайсці ў фланг падраздзяленням ЗСУ каля суседняга Навасёлаўскага.
Прарасейскі тэлеграм-канал «Два майора» фіксуе актывізацыю войскаў РФ на так званым торскім выступе па фронце.
Пра змены лініі сутыкнення на абодвух кірунках не паведамляецца.
З поўдня ад ракі Сівэрскі Данец расейцы цягам содняў прынамсі разоў атакавалі ў ваколіцах населеных пунктаў Белагораўка, Верхнякаменскае, Раздолаўка і Выемка, але заўважных поспехаў не дасягнулі. Баі на гэтых участках фронту працягваюцца.
На краматорскім кірунку Узброеныя сілы РФ наступаюць ва ўсходняй частцы гораду Часаў Яр і ў ягоных ваколіцах, імкнучыся выбіць ЗСУ жа канал Сівэрскі Данец – Данбас.
Канал «Два майора» фіксуе прасоўванні расейцаў на адлегласць да некалькіх сотняў метраў паміж сялом Калінаўка і паўночна-ўсходняй часткай гораду, а таксама на поўдні ад Часавага Яру з боку сяла Іванаўскае.
Іншая прарасейская крыніца – тэлеграм-канал «Архангел Спецназа» – сцвярджае, што адначасова з гэтым войскі РФ рухаюцца і ў самім Часавым Яры.
На тарэцкім кірунку, паводле ўкраінскага камандавання, былі адбітыя атакі расейцаў каля сяла Паўднёвае (на паўднёвым усходзе ад гораду Тарэцк).
На пакроўскім кірунку Узброеныя сілы РФ ціснуць шырокім фронтам з захаду ад раней занятага гораду Аўдзееўка.
Аналітыкі праекту Deepstate пішуць, што расейцы за содні прасунуліся ў сёлах Новааляксандраўка і Сокал, а таксама каля Новапакроўскага. Пры гэтым удакладняецца, што ў Новааляксандраўцы ўкраінскіх вайскоўцаў ужо няма, але УС РФ яшчэ не замацаваліся ў крайняй частцы населенага пункту.
Канал «Два майора» паведамляе, што таксама войскі РФ расшырылі зону кантролю на поўначы ад Сокалу і выйшлі да ўскрайкаў Яўгенаўкі.
Расейскі ваенкор Сямён Пегаў гаворыць пра рух у ваколіцах сяла Карлаўка.
Ніжэй па фронце расейцы маюць поспех у прыватным сектары на заходзе Краснагораўкі.
Праўкраінскі тэлеграм-канал «Говорять Снайпер» піша, што адначасова з гэтым горад працягвае руйнавацца ўдарамі авіяцыі РФ.
На паўднёвым участку фронту ў Данецкай вобласці, паводле Deepstate, Узброеныя сілы РФ прасунуліся на поўначы ад сяла Валадымыраўка на адлегласць да двух кіламетраў і па шырыні да шасці.
У Генштабе ЗСУ заявілі, што таксама расейцы правялі шэраг атак на так званым урэмаўскім выступе каля сяла Ураджайнае, але поспеху не дасягнулі.
У Запарожскай вобласці баі лакалізуюцца на выступе па фронце каля гораду Арэхаў. Канал «Два майора» фіксуе рух войскаў РФ каля сяла Новапакроўка. Іншая прарасейская крыніца – «Фронтовая птичка» – паведамляе пра захоп апорнай кропкі ЗСУ пад Работына.
У Херсонскай вобласці расейцы намагаюцца ўзяць пад поўны кантроль астраўную зону ў рэчышчы Дняпра. Пры гэтым украінцы контратакуюць, а таксама маюць перавагу ў паветры – за кошт БпЛА, што істотна ўскладняе дзеянні праціўніка.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu