Знаёмыя 42-гадовага гарадзенскага актывіста Дзяніса Швыркіна паведамілі аб ягонай смерці, піша Hrodna.life. Паводле знаёмых, мужчына памёр 23 верасня ад праблемаў з сэрцам.
Дзяніс Швыркін быў прадпрымальнікам і юрыстам, працаваў у кампаніі МТС. Паводле звестак «Нашай нівы», у жніўні 2020 года ён быў выбраны кіраўніком «каардынацыйнай рады грамадскасці Горадні», агучваў на акцыі 16 жніўня 2020 года патрабаванні народу. Уваходзіў у ініцыятыўную групу Віктара Бабарыкі і быў чальцом арганізацыйнага камітэту стварэння партыі Бабарыкі «Разам», балатаваўся на платформу «Сход».
23 верасня, у дзень смерці, ён напісаў на Facebook аб сваім ад’ездзе ў Польшчу. Прывёў цытату, якую памылкова прыпісваюць пісьменніку Джорджу Оруэлу: «У часы ўсеагульнай хлусні казаць праўду – гэта экстрэмізм». Пасля напісаў:
«Бывай, любая мая Гародня, да пабачэння, мілая мая Радзіма. Я веру, што мы яшчэ ўбачымся…»
У канцы жніўня 2023 года яго затрымлівалі нібыта за «распаўсюд экстрэмісцкіх матэрыялаў», але прысудзілі штраф і адпусцілі. Пасля гэтага ён з’ехаў ва Уроцлаў. Аб часе і месцы пахавання пакуль не паведамлялі.
Алесь Наваборскі belsat.eu