Суседнія з Украінаю дзяржавы адкрываюць свае межы для ўцекачоў і спрашчаюць правілы ўезду. У Польшчы разгарнулася шырокая кампанія дапамогі тым, хто бяжыць ад вайны. Распавядаем падрабязнасці.
Польшча – асноўны кірунак уцёкаў з Украіны. Украінцы і беларусы, усе, хто бяжыць з-пад абстрэлаў, могуць выехаць праз любы памежны пераход на ўкраінска-польскай мяжы. Яны ўсе адкрытыя. Каронавірусныя абмежаванні – наяўнасць тэстаў і каранцін – адмененыя.
Праз мяжу можна ехаць, нават калі няма візы: заяўку на ўцякацтва прымуць проста на мяжы. Польскі ўрад разгарнуў там некалькі мабільных пунктаў прыёму ўцекачоў.
Наяўнасць пашпарта таксама неабавязковая. Галоўнае, каб быў хоць які дакумент з вашым фотаздымкам, які пацвярджае асобу, нават калі гэта проста даведка з міграцыйнай службы.
Праўда, з украінцаў могуць выехаць толькі дзеці, жанчыны і мужчыны сталага веку, бо абвешчаная ўсеагульная мабілізацыя мужчынаў векам 18–60 гадоў.
Паводле інфармацыі МУС, працуюць усе памежныя пераходы на мяжы з Украінай, акрамя чыгуначнага памежнага пераходу Ч’ерна-над-Цісоў – Чоп: там спынены пасажырскі рух.
Пераход мяжы дазволеныя ўсім, хто ратуецца ад вайны. Заехаць могуць і тыя, хто не мае пашпарта, але, як і ў выпадку з Польшчаю, варта мець хоць які-небудзь дакумент.
Вугоршчына ўвяла часовую ахову ўкраінцам, якія прыбываюць з Украіны, і грамадзянам трэціх краінаў, якія законна пражываюць на тэрыторыі Украіны (то бок з відам на жыхарства).
Кампанія «BY_help» разам з Беларускім моладзевым хабам пачалі шырокую кампанію дапамогі ўцекачам у Польшчы, да якой можа далучыцца кожны, хто жыве ў гэтай краіне. Першае, што можна зрабіць ужо цяпер, – прыняць уцекача да сябе дамоў. У агульнай базе ахвочых дапамагчы такім чынам больш за 150 заявак з розных польскіх гарадоў. Да кампаніі далучылася польская гатэльная асацыяцыя і польскі Касцёл. Палова тых, хто падаў заяўкі, гатовая прыняць у сябе ўцекачоў на тэрмін да двух тыдняў.
Таксама ствараецца база перавознікаў, гатовых вазіць людзей ад польска-ўкраінскай мяжы ў розныя гарады Польшчы. Ужо ёсць дзясяткі заявак.
Вядуцца перамовы з гатэльнымі сеткамі для стварэння магчымасцяў для даўжэйшага пражывання ўцекачоў, таксама ствараецца інфраструктура прававога і міграцыйнага падтрымання.
У сеціве таксама з’явілася мапа экстранай дапамогі ад Цэнтру беларускай салідарнасці. Лекі, ежа, вада, вопратка, начлег, транспарт ці доктар.
Кожны, хто хоча дапамагчы мірнаму насельніцтву ў час вайны, можа змясціць сваю абвестку на мапе дапамогі. Каб дадаць пункт дапамогі, трэба запоўніць кароткую анкету.
