Менская міліцыя плануе не толькі патруляваць месцы масавага адпачынку ў пешым парадку, але і выкарыстоўваць беспілотнікі. Пра гэта паведамляе агенцтва «Минск-Новости».
«Гэта дапаможа аператыўна адсочваць абставіны, вызначаць месцы ўчынення правапарушэнняў і перадухіліць магчымыя няшчасныя выпадкі», – заявіў намеснік начальніка ўпраўлення аховы правапарадку і прафілактыкі ГУУС Менгарвыканкаму Сяргей Прыгодзіч.
Прадстаўнік ГУУС адзначыў, што асаблівую ўвагу супрацоўнікі міліцыі будуць надаваць месцам масавага адпачынку, размешчаным ля вады, а таксама месцам, дзе грамадзяне бавяць свой летні час.
«Нагадаю, што распіццё слабаалкагольных і спіртных напояў у месцах, не прызначаных для гэтых мэтаў, забароненае. Міліцыя будзе пільна за гэтым сачыць, а ў выпадку выяўлення фактаў – праводзіць з грамадзянамі прафілактычныя гутаркі. Асабліва злосных парушальнікаў прыцягнуць да адміністратыўнай адказнасці», – зазначыў Прыгодзіч.
У Менску вызначана 13 месцаў масавага адпачынку, 12 з іх размешчана каля вады. Толькі ў трох дазволенае купанне: на абсталяваных пляжах Цнянскага вадасховішча, вадасховішча Дразды і Камсамольскага возера.
Нагадаем, у сакавіку 2023 года міліцыя паведаміла, што ў ГУУС і УУС створаныя падраздзяленні для выкарыстання беспілотнікаў.
Глеб Нержын belsat.eu