Амерыканская выведка мела звесткі пра рыхтаваны мяцеж Прыгожына яшчэ на пачатку тыдня, пра што дакладала вышэйшаму кіраўніцтву, пішуць амерыканскія выданні.
Са словаў журналістаў выдання The New York Times, выведка Злучаных Штатаў мела звесткі, што Яўгеній Прыгожын рыхтуецца да пэўных дзеянняў супраць прадстаўнікоў камандавання расейскай арміі, і выведка дакладвала аб гэтым свайму кіраўніцтву, але не разгалошвала такой інфармацыі, каб не быць абвінавачанай у арганізацыі самога мяцяжу.
Яшчэ 21 чэрвеня ўсе вядомыя звесткі былі агучаныя падчас брыфінгу з прадстаўнікамі Міністэрства абароны Злучаных Штатаў і адміністрацыі Белага дому. А на наступны дзень, атрымаўшы дадатковае пацвярджэнне сваім звесткам, супрацоўнікі выведкі паінфармавалі аб магчымых падзеях прадстаўнікоў амерыканскага Кангрэсу.
Уся інфармацыя, якую атрымала выведка, была пацверджаная як надзейная, разам з тым яна выклікала вялікую трывогу, бо гэтыя падзеі маглі прывесці да хаосу ў Расеі, а з улікам таго, што яна ядравая дзяржава – да непрадказальных наступстваў.
Паводле крыніцаў выдання CNN, заявы Прыгожына аб недахопе боезапасаў на правядзенне аперацыі ва Украіне былі свядомым падманам і рабіліся наўмысна, каб зрабіцца падставаю для будучага выкліку расейскаму вайсковаму кіраўніцтву.
Усё адбылося вельмі хутка, таму цяжка было зразумець ступень сур’ёзнасці заяваў Прыгожына і спрагназаваць тое, куды ён накіруе свае сілы, гавораць суразмоўцы CNN.
Раман Шавель belsat.eu