Ананімны Telegram-канал «Пул первого» паведаміў пра новую тэлефонную размову Лукашэнкі з Пуціным. Напярэдадні, паводле афіцыйных звестак, яны размаўлялі двойчы.
Падрабязнасці гутаркі не раскрываюцца.
«Сёння раніцою Аляксандр Лукашэнка пагаварыў праз тэлефон з расейскім калегам Уладзімірам Пуціным», – напісаў ананімны Telegram-канал «Пул первого».
У Крамлі пра гэтую размову пакуль нічога не паведамілі.
Сёння ж Лукашэнка паразмаўляў з колішнім прэзідэнтам Казахстану Нурсултанам Назарбаевым: «Абмеркавалі міжнароднае становішча, сітуацыю ў рэгіёне і беларуска-казахскія стасункі».
Напярэдадні Лукашэнка стэлефанаваўся з Пуціным двойчы. Пра першую размову таксама не далі падрабязнасцяў, паведамлялася толькі, што Пуцін сам патэлефанаваў, каб распавесці пра тое, што дзеецца ў Расеі.
Другая гутарка адбылася ўвечары, калі стала вядома пра залагоджванне канфлікту з ПВК Вагнэра пры пасярэдніцтве Лукашэнкі. Паведамлялася, што Пуцін падзякаваў яму «за праведзеную працу».
Сяргей Крот belsat.eu