Прэм’ер Вугоршчыны параўнаў удзел сваёй краіны ў Еўразвязе з савецкай акупацыяй. Кіраўнік еўрапейскай дыпламатыі растлумачыў, чаму параўнанне няўдалае.
На прамове 24 кастрычніка ў гадавіну антысавецкага паўстання 1956 года прэм’ер-міністр Вугоршчыны Віктар Орбан заяўляў, што сяброўства ягонай краіны ў Еўразвязе нагадвае яму здушэнне таго паўстання Савецкім Саюзам, бо Еўразвяз «навязвае мадэль ліберальнай дэмакратыі, якую Вугоршчына адкідвае».
Вярхоўны прадстаўнік Еўразвязу ў справах замежнай палітыкі Жузэп Бурэль завочна адказаў на гэта ў той жа дзень на канферэнцыі «Еўропа і свет». Адказ на пытанне пра выказванне Орбана можна пачуць на гэтым запісе (1:05:30) па-англійску:
«Я не бачу ніякага падабенства між савецкай акупацыяй Будапэшту і таго, што адбывалася ў Бэрлемоне [штаб-кватэры Еўракамісіі. – Заўв. «Белсату»]. Я не бачыў шмат танкаў у Бэрлемоне, я не бачыў ніякай зброі. У любым выпадку ніякая структура не абавязвае Вугоршчыну быць сябрам Еўразвязу. Гэта свабодны выбар».
Еўрапарламент лічыць Вугоршчыну электаральнай аўтакратыяй. Вугоршчына за часоў кіравання Орбана часта канфліктуе з Еўразвязам. Гэтак, Вугоршчына цяпер блакуе транш дапамогі Украіне памерам паўмільярда еўраў з прычыны трапляння вугорскага банку «OTP» у спіс тых, што вядзе бізнес з Расеяй. Орбана нямала крытыкавалі ў Еўразвязе за нядаўнюю сустрэчу з Уладзімірам Пуціным, а Злучаныя Штаты выказвалі занепакоенасць сустрэчаю з «чалавекам, адказным за ваенныя злачынствы ва Украіне» (улады Вугоршчыны не лічаць Пуціна злачынцам, пра тое ж кажа і Орбан). Расея тым часам абяцала павялічыць пастаўкі газу ў Вугоршчыну.
Таксама Вугоршчына трымае сувязі з рэжымам Аляксандра Лукашэнкі: сёлета прымала з візітам міністра замежных справаў.
Пакінуць Еўразвяз сапраўды можна мірным шляхам: гэтак у 2020 годзе зрабіла Злучанае Каралеўства. Ды цяпер больш за палову жыхароў каралеўства лічыць, што брэкзіт (Brexit: «Брытанія» + «выхад») быў памылкаю – для гэтага нават прыдумалі новае слова, брэгрэт (Bregret: «Брытанія» + «шкадаванне»).
Алесь Наваборскі belsat.eu
