«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 26 траўня чытайце ў нашым аглядзе.
Паводле аператыўных звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 29600 чалавек забітымі.
За апошнія содні на Данецкім і Луганскім напрамках украінскімі сіламі былі адбітыя дзесяць атак расейцаў. Па-ранейшаму самыя актыўныя баявыя дзеянні расейцы вялі ў раёнах населеных пунктаў Ліман, Севераданецк і Аўдзііўка. Пры гэтым намесніца міністра абароны Ганна Маляр заявіла, што баі ЗСУ з расейскай арміяй дасягнулі максімальнай інтэнсіўнасці ўздоўж усёй лініі судакранання.
Дарадца Офісу прэзідэнта Украіны Аляксей Арэстовіч у сваю чаргу прызнаў, што ўкраінскі бок прайграе расейскаму па тэмпах назапашвання рэзерваў, што робіць сітуацыю на фронце вельмі цяжкай. Праз гэта магчымы вяртанне расейскай арміі на поўнач Украіны і ўзмацненне ціску па лініі Херсон – Запарожжа.
Агенцтва «Reuters» паведаміла, што Італія, Вугоршчына і Кіпр звярнуліся да кіраўніцтва ЕЗ з заявай пра неабходнасць найхутчэйшага правядзення мірных перамоваў з Расеяй і неадкладнага спынення агню.
Разам з тым кіраўніца Еўракамісіі Урзуля фон дэр Ляен, выступаючы на форуме ў Давосе, заняла жорсткую пазіцыю ў дачыненні Расеі і заявіла, што «Украіна мусіць выйграць гэтую вайну». Таксама міністарка замежных справаў Вялікай Брытаніі Ліз Трас падкрэсліла, што спробы «залагодзіць» Уладзіміра Пуціна нясуць небяспеку.
У Арганізацыі Аб’яднаных Нацый выступілі з заявай аб тым, што крызіс, звязаны з вайсковымі дзеяннямі ва Украіне, можа прывесці да дэфолту ў 70 краінах.
У Вярхоўнай Радзе зарэгістравалі законапраект пра канфіскацыю беларускай маёмасці ва Украіне. У дакуменце зазначана, што Беларусь з’яўляецца дзяржаваю-суагрэсарам, якая дапамагла Расеі здзейсніць атаку на Украіну і надала для гэтага сваю вайсковую інфраструктуру.
Прадстаўнік Дзярждэпартаменту ЗША Нэд Прайс заявіў, што краіна не здыме санкцыі з Расеі ў абмен на доступ да ўкраінскіх партоў. Таксама ён назваў жахлівым тое, што Расея імкнецца выкарыстоўваць прадукты харчавання і энергію ў якасці зброі.
Міністр замежных справаў Украіны Дмытро Кулэба таксама заклікаў не паддавацца на шантаж Расеі наконт «калідору». Нагадваем, раней у МЗС Расеі заявілі пра гатоўнасць зрабіць калідор для экспарту ўкраінскага збожжа ў абмен на зняцце санкцый і размініраванне Украінай Чорнага мора.
Прэзідэнт Украіны Уладзімір Зяленскі падтрымаў петыцыю аб візавым рэжыме для грамадзян Расеі і даручыў прэм’ер-міністру краіны Дзянісу Шмыгалю прапрацаваць гэтае пытанне. Раней Украіна не раз узмацняла жорсткасць працэсу ўезду на сваю тэрыторыю.
ВК belsat.eu