Святлана Ціханоўская прызначыла былую палітзняволеную Вольгу Гарбунову на пасаду прадстаўніцы Аб’яднанага пераходнага кабінету Беларусі ў сацыяльных пытаннях.
Прыярытэтным напрамкам дзейнасці Вольгі Гарбуновай стане арганізацыя сістэматычнай дапамогі палітзняволеным і іхным блізкім. Таксама яна ўзмоцніць працу Кабінета ў развязку праблемы палітзняволеных на міжнароднай арэне.
Акрамя таго, Вольга будзе займацца стварэннем кансалідаванай платформы беларускіх грамадскіх ініцыятываў і арганізацыяў для павелічэння эфектыўнасці іх дзейнасці па такіх напрамках, як юрыдычная, сацыяльна-псіхалагічная і гуманітарная дапамога.
Вольга Гарбунова – заснавальніца прытулку для жанчын і іхных дзяцей, пацярпелых ад хатняга гвалту, былая кіраўніца грамадскага аб’яднання «Радзіслава». Больш за 10 гадоў яна навучала прадстаўнікоў праваахоўных органаў, сістэмы сацыяльнай абароны і аховы здароўя, псіхолагаў і настаўнікаў працаваць з ахвярамі хатняга гвалту, перадухіляць яго цяжкія наступствы. 20 гадоў аказвае дапамогу ў абароне правоў уразлівых сацыяльных групаў, у тым ліку жанчын і прадстаўнікоў ЛГБТ-супольнасці.
Алена Рувіна belsat.eu
