Дзяржаўны абвінаваўца ў завочным судзе ў «справе Каардынацыйнай рады» запрасіў па 19 гадоў для Святланы Ціханоўскай і Паўла Латушкі, паведамляюць праваабаронцы.
Для іншых фігурантаў справы – Вольгі Кавальковай, Сяргея Дылеўскага і Марыі Мароз – пракурор Міхаіл Кавалёў запрасіў па 12 гадоў калоніі. Усе яны цяпер па-за межамі Беларусі, таму прысуд вынесуць завочна.
Паводле запыту дзяржабвінаваўцы, Ціханоўская, Кавалькова і Мароз павінны адбываць тэрмін у калоніі агульнага рэжыму, Латушка і Дылеўскі – узмоцненага рэжыму.
Таксама пракурор лічыць неабходным прызначыць Святлане Ціханоўскай штраф памерам 37 тысячаў рублёў, а Паўлу Латушку – забараніць права займаць пасады на тэрмін 5 гадоў.
Завочны працэс у справе супраць Каардынацыйнай рады пачаўся ў Менскім гарадскім судзе 17 студзеня 2023 года. Фігурантаў – Святлану Ціханоўскую, Марыю Мароз, Паўла Латушку, Вольгу Кавалькову і Сяргея Дылеўскага – вінавацяць паводле 12 артыкулаў: у змове з мэтаю захапіць дзяржаўную ўладу неканстытуцыйным шляхам, стварэнні экстрэмісцкага фармавання і кіраванні такім фармаваннем, у публічных закліках да санкцыяў, распальванні варажнечы.
Абранай прэзідэнтцы Беларусі асобна ставяць у віну рыхтаванне да ўдзелу ў масавых закалотах і ў групавых дзеяннях, што груба парушаюць грамадскі парадак, а таксама перашкоду працы Цэнтрвыбаркаму і здраду дзяржаве.
Справу разглядае суддзя Пётр Арлоў.
Алена Рувіна belsat.eu
