«Белсат» распавядае пра рэпрэсіі рэжыму Аляксандра Лукашэнкі, што чыняцца супраць беларускага народу. Вось пра што стала вядома за 27 сакавіка.
Былога прэс-сакратара Купалаўскага тэатру Мікалая Зайца другі раз запар пакаралі «соднямі». Яго затрымалі раніцай 13 сакавіка, склалі пратакол паводле арт. 19.1 КаАП («Дробнае хуліганства») і арыштавалі на 12 содняў. 27 сакавіка над ім адбыўся чарговы суд. Суддзя Ленінскага раёну Менску Юлія Шчоткіна прызначыла яму яшчэ 14 содняў арышту.
Дырэктара буйной кампаніі Антона Андрэнку «Авангард Лізінг» асудзілі да 2,5 года «хатняй хіміі». Яго і іншых супрацоўнікаў кампаніі затрымалі восенню 2022 года па «даносе», тады шмат каму з іх прысудзілі адміністрацыйныя арышты. Антона Андрэнку і яшчэ аднаго супрацоўніка Аляксея судзілі па адміністрацыйных артыкулах некалькі разоў. Пасля трох месяцаў на Акрэсціна супраць Андрэйкі ўзбудзілі крымінальную справу паводле ч. 1 арт. 342 КК («Удзел у групавых дзеяннях, якія груба парушаюць грамадскі парадак») і змясцілі пад варту ў СІЗА-1. Справу разглядала суддзя Марына Клімчук.
У Менску асуджаных да «хатняй хіміі» выклікаюць у крымінальна-выканаўчыя інспекцыі, дзе іх фатаграфуюць у «анфас» і «профіль». Праваабаронцы паведамляюць, што гэта робіцца для таго, каб адсочваць людзей па камерах назірання ў ГЦ – ці не знаходзяцца яны там у «забаронены» час. Праз такое «парушэнне» людзям могуць узмацніць пакаранне.
Былога следчага Яўгена Юшкевіча ўнеслі ў «тэрарыстычны спіс». Цяпер у «тэрарыстычным спісе» 1034 чалавекі, з іх 286 – беларусы.
Беларускага футбаліста ФК «Макслайн» Цімафея Лукашэвіча затрымалі 23 сакавіка наўпрост падчас трэніроўцы каманды ў Менску. Разам з ім затрыманая і ягоная нявеста Кацярына. Паведамляецца, што ім прызначылі па 10 содняў адміністрацыйнага арышту, але за што – невядома.
У Менску за ўдзел у акцыі пратэсту 16 жніўня 2020 года 23-гадовага Міхаіла Кандратовіча асудзілі на два з паловай гады «хатняй хіміі». Яго абвінавацілі паводле ч. 1 арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»). Падставай для затрымання і асноўным доказам па справе стаў фотаздымак са старонкі ў Instagram Міхаіла. На ёй зафіксаваны ўдзельнікі акцыі, якія трымаюць над галавой бчб-сцяг. Суддзя Юлія Шчоткіна прызначыла Міхаілу два з паловай гады «хатняй хіміі».
Палітвязня Міхаіла Кухарчука, якога вінавацілі ў напісанні 860 пратэсных каментароў, асудзілі да году калоніі. Яго прызналі вінаватым паводле ч. 1 арт. 368 КК («Абраза прэзідэнта Рэспублікі Беларусь»).
Алена Рувіна belsat.eu