«Белсат» падводзіць вынікі 397-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 27 сакавіка чытайце ў нашым аглядзе.
Цягам апошніх содняў сітуацыя на ўкраінска-беларускай і ўкраінска-расейскай межах заставалася нязменнай: Генеральны штаб Збройных сілаў Украіны не фіксуе фармавання наступальных груповак праціўніка.
Пры гэтым войскі РФ працягваюць утрымліваць свае сілы ў Курскай і Белгародскай вобласцях, якія не дазваляюць ЗСУ перакінуць рэзервы на іншыя ўчасткі.
Таксама ўкраінскае камандаванне адзначае артылерыйскія абстрэлы ваколіцаў памежных населеных пунктаў у Сумскай і Харкаўскай вобласцях.
Непасрэдна па лініі фронту ў Харкаўскай вобласці Узброеныя сілы РФ працягваюць беспаспяхова атакаваць каля сяла Сінькаўка ў Купянскім раёне. Галоўная задача тут — выціснуць ЗСУ на іншы бераг ракі Аскіл.
Па лініі фронту ў Луганскай вобласці, паводле праекту Deepstate, трываюць лакальныя баі ўздоўж усёй лініі сутыкнення.
Расейскі ваенкор Сямён Пегаў узгадвае наступальныя дзеянні войскаў РФ каля Белагораўкі, Макееўкі і Неўскага. На гэтых участках фронту расейцам таксама не ўдалося дасягнуць заўважнага поспеху.
Больш актыўныя баявыя дзеянні вядуцца па лініі фронту на тэрыторыі суседняй Данецкай вобласці, якая ўмоўна падзеленая на некалькі кірункаў: бахмуцкі, аўдзееўскі, мар’інскі і шахцёрскі.
Паводле Генштабу ЗСУ, у ваколіцах Бахмуту былі адбітыя атакі праціўніка каля Багданаўкі і Іванаўскага.
Deepstate дадае спробы прарваць украінскую абарону ў Хромаве, Пегаў — каля Прэдтэчыны. Гэткімі дзеяннямі расейцы намагаюцца перарэзаць шляхі забеспячэння ЗСУ ў Бахмуце, аднак пакуль сілы абароны ўпэўнена трымаюць свае пазіцыі.
У самім райцэнтры працягваюцца баі на поўначы і поўдні, расейцы маюць частковы поспех і паступова прасоўваюцца ў бок цэнтру гораду.
Таксама зафіксаванае прасоўванне падраздзяленняў ПВК «Вагнер» на заходні бераг ракі Бахмутка — у ваколіцах мясцовай школы №5.
На аўдзееўскім кірунку — на поўначы ад Данецку — Узброеныя сілы РФ не пакідаюць спробаў атачыць аднайменны раённы цэнтр, дзеля чаго атакуюць на поўначы, захадзе і поўдні ад Аўдзееўкі.
Украінскае камандаванне фіксуе няўдалыя наступальныя дзеянні праціўніка каля населеных пунктаў Новабахмутаўка, Новакалінавае, Аўдзееўка, Севернае, Первамайскае і Невельскае.
Між тым Сямён Пегаў сцвярджае, што расейцы ўвайшлі ў сяло Новакалінавае, пасля чаго прасунуліся да пасёлку Керамік (на поўначы ад Аўдзееўкі)
На мар’інскім кірунку расейцы атакавалі каля Пабеды, Краснагораўкі і Новаміхайлаўкі.
Тэлеграм-канал «Два майора» піша, што войскі РФ пашырылі паўночны выступ фронту каля Краснагораўкі.
Таксама працягваюцца гарадскія баі ў самой Мар’інцы, у якой апошняя крыніца адзначае прасоўванні расейцаў на поўначы і поўдні.
На шахцёрскім кірунку на поўдні Данецкай вобласці цягам содняў ніводны з бакоў канфлікту не праводзіў наземных аперацыяў.
Таксама нязменнай застаецца сітуацыя фронце ў Запарожскай, Херсонскай і Мікалаеўскай вобласцях, аднак паўсюль адзначаюцца артылерыйскія абстрэлы ўздоўж лініі сутыкнення.
Паводле Генштабу ЗСУ, агулам за апошнія содні вайны сілы абароны адбілі больш за 60 атак праціўніка на ўсходзе краіны.
У гэты ж час ЗСУ знішчылі каля 610 расейскіх вайскоўцаў, у выніку чаго агульныя беззваротныя страты РФ перавысілі 171 тысячу чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
ТМ belsat.eu