Ад 2022 года амерыканскія вайскоўцы будуць толькі навучаць і кансультаваць іракцаў, але браць удзел у баявых дзеяннях не стануць.
Прэзідэнт Злучаных Штатаў Джоў Байдэн і прэм’ер-міністр Ірака Мустафа аль-Казымі сустрэліся ў Вашынгтоне 26 ліпеня і заключылі пагадненне аб фармальным завяршэнні баявой місіі ЗША ў Іраку да канца 2021 года, піша Reuters.
«Наша роля ў Іраку будзе… быць дасяжнымі, працягваць навучанне, падтрымліваць, дапамагаць і змагацца з [тэрарыстычнай арганізацыяй] «Ісламскай дзяржавай», калі яна ўздыме галаву, але па сканчэнні года мы не будзем браць удзел у баявых місіях», – расказаў Байдэн.
Цяпер у Іраку каля 2500 амерыканскіх вайскоўцаў, якія змагаюцца з тым, што засталося ад тэрарыстычнай «Ісламскай дзяржавы».
Паводле Reuters, радыкальных зрухаў у тым, што робяць Штаты ў Іраку, не будзе, бо ЗША ўжо да таго сфакусаваліся на падрыхтоўцы іракскіх сілаў.
Аднак гэтае рашэнне разам з вывадам войскаў ЗША з Афганістану завяршае дзве ваенныя кампаніі, якія амаль 20 гадоў таму распачаў прэзідэнт Джордж Буш-малодшы.
Злучаныя Штаты ў 2003 годзе ўвялі войскі ў Ірак, бо падазравалі тагачаснага кіраўніка Іраку Садама Хусэйна ў валоданні зброяй масавага знішчэння. Хусэйна адхілілі ад улады, але зброі масавага знішчэння не знайшлі. Хусэйна судзіў Вярхоўны суд Іраку, яго пакаралі смерцю напрыканцы 2006 года.
АА belsat.eu
