Мужчына зайшоў у паштовае аддзяленне ў Воршы, калі там нікога не было, па-зверску забіў работніцу, забраў з касы каля трох тысячаў рублёў і падпаліў памяшканне. 71-гадовага падазраванага ў забойстве затрымалі на наступны дзень, паведамляе тэлеграм-канал «Милиция Витебщины».
Аператыўна-вышуковымі захадамі кіраваў асабіста міністр унутраных справаў Іван Кубракоў. Падазраваным аказаўся неаднаразова суджаны за крадзяжы, хуліганства, разбой і забойства 71-гадовы жыхар Воршы.
«Пры затрыманні ён паспрабаваў уцячы. Супрацоўнікі ўжылі зброю. З агнястрэльнымі раненнямі мужчына шпіталізаваны», – паведамляе міліцыя.
На гэты момант у Воршы трывае комплекс аператыўна-вышуковых захадаў і следчых дзеянняў, каб высветліць усе абставіны здарэння.
Зміцер Міраш belsat.eu
