Уладзімір Зяленскі завочна адказаў Святлане Ціханоўскай на заяву пра тое, што яна не выключае просьбы аб дапамозе ў вызваленні Беларусі. Прэзідэнт Украіны сказаў, што перамога ягонай краіны ў вайне аўтаматычна дапаможа і Беларусі, і Грузіі, і Малдове.
Сёлета ў чэрвені ў гутарцы з украінскай журналісткай Наталляй Масейчук абраная прэзідэнтка Святлана Ціханоўская не выключыла, што папросіць Уладзіміра Зяленскага «дапамагчы вызваліць Беларусь».
Гэты фрагмент размовы журналістка паказала ўкраінскаму прэзідэнту пасля інтэрв’ю з ім. Зяленскі заявіў, што «украінская перамога паставіць кропку» і дапаможа не толькі Беларусі, але і Грузіі з Малдоваю:
«Упэўнены: перамога Украіны даць магчымасць палітычнаму развязанню, дэмакратыі, вяртанню цэласнасці тых дзяржаваў, у тым ліку Беларусі, цэласнасці Грузіі і Малдовы. І не патрэбна думаць спадарыні Ціханоўскай пра войскі іншых дзяржаваў, я так мяркую».
Афіцыйны Кіеў захоўвае мінімальны ўзровень кантактаў з Офісам Ціханоўскай. Лідары сустрэліся толькі аднойчы, сёлета ў траўні на цырымоніі ўручэння Прэміі Карла Вялікага ў Нямеччыне. Зяленскі і Ціханоўская паціснулі адно аднаму рукі і не мелі нават кароткай размовы.
Сяргей Крот belsat.eu