«Белсат» падводзіць вынікі 307-х содняў поўнамаштабнай вайны, распачатай Расеяй ва Украіне. Пра галоўныя падзеі на вечар 27 снежня чытайце ў нашым аглядзе.
У паўночна-ўсходняй частцы Харкаўскай вобласці, а таксама на захадзе Луганскай працягваюцца пазіцыйныя баі, якія адзначаюцца асаблівай інтэнсіўнасцю ў ваколіцах Плашчанкі і Крэмінной.
Расейскі ваенны карэспандэнт Сямён Пегаў піша, што Збройныя сілы Украіны, атакуючы каля Дзібровы і Кузьміна, намагаюцца пашырыць сваю зону кантролю ў лясным масіве каля Крэмінной. У гэты ж час на поўнач ад гэтага ўчастку фронту ініцыятываю валодаюць войскі РФ, якія атакуюць у ваколіцах Чырвонапапоўкі, Неўскага, Плашчанкі, Стэльмахоўкі і Навасёлаўскага.
Між тым тэлеграм-канал «Рыбарь» паведамляе пра ўкраінскі наступ каля Чырвонапапоўкі, у выніку якога ЗСУ занялі адзін з апорных пунктаў праціўніка.
Кіраўнік Луганскай абласной вайсковай адміністрацыі Сяргей Гайдай паведамляе, што расейцы сцягваюць вялізную колькасць жывой сілы і тэхнікі да Крэмінной, але гэта ўсё адно не дапамагае ім выправіць сітуацыю. Цяпер праціўнік засяродзіўся ў лесапалосах каля гораду і замініраваў тэрыторыю вакол сябе. Паводле Гайдая, у выніку вызвалення Крэмінной уся лінія абароны расейцаў у Луганскай вобласці будзе парушаная.
На тэрыторыі Данецкай вобласці асноўныя баявыя дзеянні праходзяць на бахмуцкім і аўдзееўскім кірунках.
Генеральны штаб ЗСУ піша пра адбіццё атак праціўніка каля Дылееўкі, Краснагораўкі, Вадзянога, Вясёлага, Мар’інкі і Пабеды.
Аналітыкі праекту «Deepstatemap» фіксуюць баі на стыку Бахмуцкага і Салядару, у Вопытным і каля Кляшчэеўкі, а таксама спробы штурму расейцамі цэнтру Мар’інкі.
Пегаў адзначае расейскія атакі ў ваколіцах Дружбы, Курдзюмаўкі і Падгароднага. Таксама, паводле ваеннага карэспандэнта, працягваюцца сустрэчныя баі на ўсходніх ускрайках Бахмуту.
Намесніца міністра абароны Украіны Ганна Маляр заявіла, што расейцы па-ранейшаму спадзяюцца выйсці да межаў Данецкай вобласці да канца гэтага года, дзеля чаго яны сканцэнтравалі значныя сілы на асобных участках фронту, у прыватнасці ў ваколіцах Бахмуту.
Тым часам прарасейскія рэсурсы пачалі актыўна абмяркоўваць далейшы лёс гораду. Асобныя з іх мяркуюць, што ЗСУ неўзабаве здадуць райцэнтр, і гэта будзе выклікана ў першую чаргу вялізнаю колькасцю стратаў сярод вайскоўцаў. Іншыя ж крыніцы адзначаюць наяўнасць рэзерваў, якія дапамогуць Украіне ўтрымаць горад.
Між тым усе рэсурсы сыходзяцца на тым, што ЗСУ ўжо паспелі падрыхтаваць другую і трэцюю лініі абароны за Бахмутам.
Сітуацыя па лініі фронту ў Запарожскай, Херсонскай і Мікалаеўскай вобласцях застаецца адносна спакойная: абодва бакі канфлікту засяродзіліся на вядзенні абароны і нанясенні артылерыйскіх удараў.
Паводле Генштабу ЗСУ, цягам мінулых содняў былі знішчаныя каля 620 расейскіх вайскоўцаў, пасля чаго агульныя беззваротныя страты РФ з моманту пачатку поўнамаштабнай вайны ва Украіне дасягнулі 103 220 чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйных паведамленняў удзельнікаў вайны.
ВК belsat.eu