Дэпутаты грузінскага парламента здолелі пераадолець вета, накладзенае прэзідэнткай Саламе Зурабішвілі, на закон «Аб празрыстасці іншаземнага ўплыву», з-за якога ў краіне пачаліся маштабныя пратэсты.
Супраць заўвагаў, выказаных грузінскай прэзідэнткай Саламе Зурабішвілі, прагаласавалі 66 дэпутатаў (яна прапаноўвала, каб скандальны закон быў адменены на наступны дзень пасля таго, як будзе ўведзены ў дзеянне), за пераадоленне вета прэзідэнткі аддалі галасы 84 народныя абраннікі, супраць – 4.
Такім чынам, зараз закон будзе перададзены на подпіс прэзідэнтцы. У яе будзе пяць дзён на тое, каб падпісаць дакумент. Калі Зурабішвілі адмовіцца ад падпісання, то закон падпіша старшыня парламенту – Шалва Папуашвілі.
Згодна з новым законам «Аб празрыстасці іншаземнага ўплыву», няўрадавыя арганізацыі і медыі, якія болей чым на 20 % гадавога даходу фінансуюцца з-за мяжы, мусяць быць зарэгістраваныя як арганізацыі, якія праводзяць інтарэсы замежнай сілы.
Каб не дапусціць прыняцце гэтага закона, у краіне пачаліся масавыя выступленні грамадзянаў.
Раман Шавель belsat.eu
