Грузіны гатовыя дапамагаць расейцам, калі тыя – супраць Пуціна

Дзясяткі тысяч грамадзянаў Расеі пасля абвяшчэння мабілізацыі пакінулі краіну і выехалі за мяжу. Журналісты «Белсату» на вуліцах Тбілісі запыталі ў расейцаў, чаму яны з’ехалі з краіны, а ў грузінаў, ці варта дапамагаць уцекачам.

Цяпер у Грузіі дзясяткі тысяч грамадзянаў Расеі, якія пасля абвяшчэння мабілізацыі пакінулі сваю краіну. У Тбілісі журналісты «Белсату» запыталіся ў грамадзянаў Грузіі, ці варта падтрымаць і прыняць асобаў, якія ўцякаюць ад прызыву ў войска.

«Уцекачам заўсёды трэба дапамагаць, якімі б яны не былі. А чаму ўцякаюць? Дык а хто ў ХХІ стагоддзі хоча вайны? Таму трэба дапамагаць», – кажа мужчына сталага веку.

«Не, не трэба дапамагаць. Вайна – гэта вельмі кепска. Маладыя людзі гінуць. А за што? Мы павінныя жыць разам і дружна. Хіба можна слухацца Пуціна? Ён як мафіёзі. Ён акупаваў 20 % нашай Грузіі. Няхай верне нашую зямлю, нашыя дамы», – абураецца жанчына.

«Калі яны супраць Пуціна – то трэба прымаць. А калі за Пуціна – то не. Галоўнае, каб яны былі супраць кіраўніцтва Крамля», – лічыць малады мужчына.

Расейцы, якіх сустрэлі ў Тбілісі журналісты «Белсату», кажуць, што не падтрымліваюць палітыкі Пуціна і выступаюць супраць вайны.

«Я з’ехаў, бо пачалася спецаперацыя. Але гэта не ў маіх інтарэсах, нават не ў інтарэсах маёй краіны, бо прэзідэнта мы не выбіраем. У Грузіі нас прынялі даволі добра. Я не сустракаў агрэсіі. Мяне тут усё задавальняе.

Я раней чуў, што ў Грузіі не вельмі задаволеныя людзі, што прыязджаюць з Расеі, але ніякага кепскага стаўлення тут не сустракаў. А з’ехаў, паколькі не выключаю, што праз некаторы час могуць закрыць межы. Таму падумаў, што лепей, каб у мяне была магчымасць вярнуцца дадому, чым апынуся ў сітуацыі, калі не змагу выехаць», – кажа малады чалавек.

«Я з’ехаў, бо пачалася мабілізацыя. А браць удзел у вайне не хачу, не хацеў і ніколі не захачу. У мяне шмат сяброў ва Украіне. Тое, што могуць мабілізаваць, даць зброю, каб нешта ахоўваць на акупаваных тэрыторыях, – для мяне гэта непрымальна. Таму было некалькі варыянтаў: або хавацца недзе ў Расеі, або сесці ў турму, або з’ехаць. Я абраў апошні варыянт. Прынялі мяне ў Грузіі даволі добра. Людзі добразычлівыя, успрымаюць цябе як простага чалавека», – кажа грамадзянін Расеі.

«Я толькі прыехаў, нават ні з кім яшчэ не сустрэўся. Спрабаваў абмяняць расейскія рублі, але мне адмовілі ў гэтым. З’ехаў жа таму, што жыву ў памежным рэгіёне, у Растове. Там цяпер абвастраецца сітуацыя. Ціск назіраецца з боку сілавікоў, чыноўнікаў. Вайны не падтрымліваю, Пуціна таксама не падтрымліваю.

Я катэгарычна супраць вайны. Я вучыўся ў вайсковай вучэльні, зразумеў, што гэта такое. У Грузіі прынялі даволі добра, праблемаў няма. Тут можна дамовіцца або па расейску, або на ангельскай мове», – кажа расейкі ўцякач.

Алена Аляксандрава belsat.eu