У небе над Саратаўскай вобласцю ў Расеі вайсковы самалёт Міністэрства абароны РФ небяспечна зблізіўся з бізнес-джэтам. Паводле папярэдняй інфармацыі, збліжэння не заўважыў дыспетчар, піша Telegram-канал «BAZA».
Іл-76 ВКС Расеі з бартавым нумарам RF-78663 знізіўся і небяспечна наблізіўся да прыватнага самалёта Pilatus HC-12NG, які належыць беларускай кампаніі «BySky». Самалёты ляцелі курсамі, якія перасякаліся.
У момант збліжэння гарызантальная адлегласць паміж самалётамі была 1,5 кіламетра, вертыкальная – менш за 300 метраў.
Расавіяцыя стварыла камісію для расследавання гэтага інцыдэнту. Паводле папярэдняй інфармацыі, самалёты зблізіліся праз памылку дыспетчара, які не адсачыў своечасова сітуацыю і позна зрэагаваў.
Алена Аляксандрава belsat.eu
