Каманда экспертаў Міжнароднага агенцтва атамнай энергетыкі (МАГАТЭ) ужо гатовая наведаць Запарожскую атамную электрастанцыю ва Украіне, паведаміў генеральны дырэктар арганізацыі Рафаэль Гросі.
«Гэты дзень настаў. Місія МАГАТЭ дзеля падтрымання і дапамогі Запарожскай АЭС ужо ў дарозе. Мы мусім абараніць бяспеку найбуйнейшага ядравага аб’екту Украіны і Еўропы. Я ганаруся тым, што ўзначальваю гэтую місію, якая адбудзецца на гэтым тыдні», – напісаў у Twitter Рафаэль Гросі.
25 жніўня Запарожскую АЭС упершыню цалкам адключылі ад энергасетак. Пазней у МАГАТЭ заявілі, што сувязь Запарожскай АЭС з энергасістэмай Украіны аднавілася, але ўсе шэсць блокаў АЭС застаюцца адключанымі.
The day has come, @IAEAorg‘s Support and Assistance Mission to #Zaporizhzhya (ISAMZ) is now on its way. We must protect the safety and security of #Ukraine’s and Europe’s biggest nuclear facility. Proud to lead this mission which will be in #ZNPP later this week. pic.twitter.com/tyVY7l4SrM
— Rafael MarianoGrossi (@rafaelmgrossi) August 29, 2022
Раней Дзяржаўная інспекцыя ядравага рэгулявання Украіны папярэджвала, што спыненне энергаблокаў і страта ўсіх крыніцаў электраэнергіі можа прывесці да псавання сістэмаў ахаладжэння, пашкоджання актыўнай зоны рэактарнай устаноўкі і выкіду радыеактыўных рэчываў у навакольнае асяроддзе. Акурат паводле такога сцэнару адбылася аварыя на японскай АЭС «Фукусіма-1» у 2011 годзе.
У нядзелю акупаваны расейскімі войскамі Энергадар, дзе месціцца АЭС, трапіў пад чарговыя абстрэлы, у якіх бакі абвінавачваюць адно аднаго.
Зміцер Міраш belsat.eu
