Такі дазвол прынялі «з мэтаю падтрымаць добрасуседскія дачыненні», паведамляе Дзяржаўны памежны камітэт.
Грамадзяне Польшчы змогуць без візаў наведаць Беларусь з поўначы 1 ліпеня да 31 снежня ўключна. Для ўезду ў Беларусь неабходна будзе паказаць толькі сапраўдны дакумент для выезду за мяжу, зялёную карту (пры ўездзе машынай), а таксама мець пры сабе медычную страхоўку.
ПЛР-тэст ці сертыфікат аб вакцынацыі не патрабуюцца.
Грамадзянам Польшчы можна будзе мінаць мяжу ў пунктах пропуску на беларуска-польскім участку мяжы. Таксама ім будзе дазволена наведваць памежную зону без пропуску. Пры ўездзе ў Беларусь у пункце пропуску дастаткова будзе вусна паведаміць супрацоўніку органаў памежнай службы пра намер наведаць памежную зону з пазначэннем мясцовасцяў і мэты.
Марыя Мурашка belsat.eu