30 ліпеня, у часе прамовы перад прадстаўнікамі мясцовай вертыкалі, Аляксандр Лукашэнка выказаўся пра працу рэгіянальных журналістаў і блогераў, піша БелТА.
Паводле Лукашэнкі старшыні райвыканкамаў і іх намеснікі, якія адказваюць за ідэалогію, мусяць цалкам кантраляваць інфармацыйную прастору. «Кожны старшыня выканкаму павінен мець дакладнае ўяўленне аб інфармацыйнай мапе свайго раёну ці гораду. Якія медыі і рэсурсы дзейнічаюць, якую рэдакцыйную палітыку яны праводзяць, якой падтрымкай насельніцтва карыстаюцца, – заявіў Лукашэнка. – Намеснік старшыні, які курыруе пытанні ідэалогіі і інфармацыі, павінен у твар ведаць усіх мясцовых журналістаў, блогераў, адміністратараў тэлеграм-каналаў і чатаў, працаваць з імі асабіста. Усё павінна быць не проста пад кантролем, а рабіцца з вашага дазволу».
Таксама Лукашэнка ў часе выступу заявіў, што свабода слова ў Беларусі пераўтварылася ў экстрэмісцкую дзейнасць.
Паводле «Беларускай асацыяцыі журналістаў» цяпер за кратамі ў Беларусі 27 працаўнікоў медыяў. Усе буйныя грамадска-палітычныя блогеры або пазбаўленыя волі, або былі вымушаныя выехаць з Беларусі.
