Атрымаць гуманітарную візу беларусы цяпер змогуць наўпрост у Польшчы
2022.08.30 16:27
30 жніўня ўступае ў сілу распараджэнне Міністра замежных справаў Польшчы адносна магчымасці для беларусаў атрымаць польскую гуманітарную візу, не выязджаючы з краіны, паведамляе Free Belarus Center.
Беларусы змогуць атрымаць польскую гуманітарную візу наўпрост у Польшчы. Фота мае ілюстратыўны характар. Крыніца: Hrodna.life
Хто зможа падаць заяву на візу?
Згодна з новым распараджэннем, беларусы да 31 снежня 2022 году змогуць падаць заявы на атрыманне:
гуманітарных візаў, на падставе якіх будуць мець магчымасць падаць заяву на часовае пражыванне тэрмінам на 3 гады,
нацыянальных візаў для працы кіроўцам у міжнародных перавозках пасажыраў ці грузаў.
Атрымаць гуманітарныя візы змогуць беларусы, якія:
у дзень падачы заявы знаходзіліся на тэрыторыі Польшчы на падставе дзейных гуманітарных візаў (D21) ці
да пачатку поўнамаштабнай вайны пражывалі на тэрыторыі Украіны, адкуль пасля 24.02.2022 з’ехалі ў Польшчу.
Для атрымання гуманітарных візаў беларусы павінны будуць падпісаць заяву, што яны не могуць вярнуцца ў краіну паходжання для атрымання візы з прычынаў бяспекі ці з-за магчымых пераследу ці рэпрэсіяў.
Дзе падаць заяву на візу?
на нацыянальную візу для працы кіроўцам-міжнароднікам – у ваяводскім упраўленні па месцы знаходжання
на гуманітарную візу – у адной з фірмаў-пасярэдніц, якая даставіць дакументы ў МЗС (спіс гэтых фірмаў будзе прадстаўлены ў бліжэйшы час).