Урад Латвіі 30 жніўня прыняў папраўкі МУС у спіс краінаў, грамадзянаў якіх будуць дадаткова правяраць пры выдачы візаў і відаў на жыхарства, піша Delfi.lv.
МУС і Служба дзяржаўнай бяспекі Латвіі прапанавалі залучыць у спіс Беларусь, Расею і Камерун. Цяпер расейцы будуць трапляць пад дадатковыя правяранні, незалежна ад месца рэгістрацыі ў РФ. Раней правяралі толькі жыхароў такіх расейскіх рэгіёнаў, як Чачэнія, Дагестан, Інгушэція, Паўночная Асеція.
Падчас правярання будуць ацэньваць, ці не ўяўляе ўезд замежніка ў Латвію пагрозы нацыянальнай бяспецы ці грамадскаму парадку.
Цяпер Латвія не прымае заяваў на візы ад грамадзянаў Расеі. Выключэнні робяцца толькі для тых, хто патрабуе абароны і прэтэндуе на гуманітарную візу.
Спіс краінаў, грамадзянаў з якіх будуць дадаткова правяраць, будзе пераглядацца ў Латвіі не радзей за раз на тры гады.
Таксама ў аўторак, 30 жніўня, у Празе адбудзецца нефармальнае паседжанне Рады замежных справаў Еўразвязу, на якім абмяркуюць забарону на ўезд у ЕЗ для грамадзянаў Расейскай Федэрацыі.
Міністр замежных справаў Латвіі Эдгар Рынкевіч напісаў у Twitter, што разам з краінамі-аднадумцамі будзе выступаць за забарону візаў ЕЗ для грамадзянаў Расейскай Федэрацыі.
Марыя Міхалевіч belsat.eu
