Дарадца кіраўніка Офісу прэзідэнта Міхайло Падаляк заявіў, што Украіна распрацоўвае маршруты эвакуацыі для жыхароў Крыму на час дэакупацыі.
«Зразумела, што для Украіны жыццё грамадзян – безумоўны прыярытэт. Таму мы ўжо распрацоўваем эвакуацыйныя маршруты для жыхароў акупаванага Крыму, якія жадаюць пакінуць востраў на час актыўнай дэакупацыі», – напісаў у Twitter Падаляк.
Да гэтага часу Падаляк папрасіў усіх жыхароў паўвострава трымацца далей ад ваенных аб’ектаў і праверыць сховішча.
У першай палове жніўня пачасціліся выбухі ў акупаваным Крыме. Выбухі прагрымелі ў Сімферопалі, Севастопалі, Бахчысараі, паблізу Алупкі і Еўпаторыі. Ва ўкраінскіх медыях выходзілі навіны аб тым, што расейцы масава ўцякаюць з Крыму і што цэны на жытло рэзка падаюць. Цяпер і прадстаўнік украінскага ўраду заклікаў мясцовых жыхароў і адпачывальнікаў быць асцярожнымі.
Таксама прыходзілі паведамленні, што расейскія войскі ў Крыме пачалі эвакуацыю людзей пасля выбухаў на складзе боепрыпасаў паблізу Джанкоя. Па стане на 16 жніўня ўжо выехалі каля 2 тысяч чалавек.
Алена Рувіна belsat.eu