30 кастрычніка ў расейскай Яшкар-Але аднаго з удзельнікаў акцыі ў памяць пра ахвяраў бальшавіцкага тэрору затрымалі за плакат, напісаны па-беларуску.
30 кастрычніка прайшло ўскладанне кветак да мемарыялу ахвяраў палітычных рэпрэсіяў, на якое прыйшлі сваякі рэпрэсаваных савецкімі ўладамі, піша выданне «Idel.Реалии».
Мясцовыя ўлады адмовілі ініцыятыўнай групе ў правядзенні мітынгу.
Але пасля завяршэння акцыі да аднаго з удзельнікаў – Кірыла Вайтовіча – падышлі паліцыянты і затрымалі за тое, што ён размясціў плакат у адной з нішаў мемарыялу, дзе былі кнігі аб рэпрэсіях і партрэты ахвяраў сталінскага тэрору.
На плакаце мужчыны быў надпіс, зроблены па-беларуску:
«Ноч паэтаў. 29–30 кастрычнiка. Вечная памяць ахвярам бальшавiцкага тэрору. Жыве вечна».
Паводле словаў удзельнікаў акцыі, Вайтовіча пасадзілі ў паліцэйскую машыну і адправілі ў аддзяленне паліцыі. Меркавана, для правядзення «прафілактычнай размовы».
Нагадаем, што 28 кастрычніка суд у Маскве арыштаваў студэнта першага курсу на пяць содняў за выкарыстанне студэнцкага білета з выявай бела-чырвона-белага сцяга. На думку паліцэйскіх, гэты сцяг ёсць сімвалам палка імя Кастуся Каліноўскага.
Раман Шавель belsat.eu