Выданне The Insider атрымала дакументы, якія сведчаць пра тое, што Крэмль пачаў рыхтаваць на акупаваных тэрыторыях Украіны рэферэндум аб іх далучэнні да Расеі. Рэферэндум рыхтуюць не толькі ў так званых ЛДНР, але і на захопленых тэрыторыях пасля 24 лютага.
Дакументы, якія трапілі ў распараджэнне The Insider, сведчаць, што ў Крамлі ўжо прынятае рашэнне аб далучэнні да тэрыторыі Расеі ўсіх акупаваных украінскіх тэрыторыяў. Кіраўніцтва РФ рыхтуе рэферэндум, які мае адбыцца ў верасні. Пры гэтым у Крамлі адкрыта прызнаюць: вырашаць лёс украінцаў і іх тэрыторыі будуць ЦВК Расеі і Беларусі.
Дакладнай даты рэферэндуму яшчэ няма. Але нават нягледзячы на гэта, у Расеі ўжо і вызначыліся з вынікамі галасавання. Галасоў «за» далучэнне патрэбна столькі, каб гэта складала абсалютную большасць ад выбарнікаў Данецкай і Луганскай абласцей (гэта значыць у выпадку, напрыклад, з Данецкай – 1, 2 млн чалавек). Захопнікі рыхтуюць дзяржаўныя сацапытанні, якія павінныя падрыхтаваць грамадскасць да мэтавага выніку для «легітымізацыі рэферэндуму».
З дакументаў вынікае, што агрэсар разумее немагчымасць нармальнай арганізацыі выбараў, таму прапісанае галасаванне ў аўтобусах і палатках. Вядома, што камісіі будуць збіраць у тым ліку і з прывезеных грамадзянаў з Расеі. А лічыць вынікі галасавання ва Украіне будзе Эла Памфілава, кіраўніца ЦВК РФ. Таксама галасаваць змогуць бежанцы, якія апынуліся ў Расеі і Беларусі.
Таксама ў Крамлі занепакоеныя і «абаронай» вынікаў галасавання.
Алена Аляксандрава belsat.eu