Як паведаміў партал infobank.pt, Нацбанк накіраваў у банкі ліст з папярэджаннем, што замежныя сэрвісы пераводу грошай, якія не зарэгістраваліся ў адмысловым рэестры, не могуць працаваць у Беларусі з 27 жніўня. Адразу некалькі кампаніяў былі ўлучаныя ў гэты пералік за два дні да дэдлайну.
Ліст Нацыянальнага банку датаваны 24 жніўня. На той дзень, як адзначалася ў паведамленні, ніводная з замежных сістэмаў пераводу грошай не зарэгістравалася ў якасці пастаўляльніка плацежных паслугаў. Рэгулятар папярэджваў, што з 27 жніўня гэтым сэрвісам будзе забаронена працаваць у Беларусі.
Рэгістрацыя кампаніяў у адмысловым рэестры прадугледжаная законам, які быў апублікаваны яшчэ ў красавіку 2022 года. Ужо з таго часу замежныя сервісы мусілі ведаць пра гэтае патрабаванне, на выкананне якога далі амаль паўтара года. Аднак яны цягнулі да апошняга.
Цяпер на сайце Нацбанку маецца рэестр, абноўлены 25 жніўня. У той дзень у пералік улучылі «Золотую корону», «Юнистрим», «КИВИ Банк» (плацежная сістэма «Contact»), кітайскую плацежную сістэму «UnionPay International».
«Гэтыя кампаніі цяпер будуць працягваць працу ў штатным рэжыме. Для расейскіх сэрвісаў беларускі рынак застаецца важным, яны хочуць працягваць на ім працаваць, адпаведна, яны выканалі гэтыя патрабаванні», – заўважыла ў каментары «Белсату» старэйшая навуковая працаўніца даследчага цэнтру BEROC Настасся Лузгіна.
Пасля пачатку вайны ва Украіне працу ў Беларусі спынілі амерыканскія сэрвісы «Western Union» і «Ria Money Transfer». Засталася толькі кампанія «MoneyGram» (таксама з ЗША), яна мае супрацу з дзвюма беларускімі банкамі.
Паводле звестак Нацбанку, у студзені – чэрвені сёлета праз міжнародныя сістэмы грашовых пераводаў у Беларусі атрымалі $ 81,3 млн, а вывелі з краіны $ 64,5 млн.
Сяргей Крот belsat.eu