Чалавецтва можа сутыкнуцца з голадам надзвычайнага маштабу ўсяго праз некалькі месяцаў, калі своечасова не прыняць захадаў дзеля харчовай бяспекі краінаў. Пра гэта паведамляе ТАСС.
«Калі не пачаць дзейнічаць зараз – забяспечваць доступ, не дапусціць перабоі з фінансаваннем і гандлем – то мы можам сутыкнуцца з голадам сапраўды біблійнага маштабу ўсяго праз некалькі месяцаў», – паведаміў 22 красавіка выканаўчы дырэктар Сусветнай харчовай праграмы ААН Дэйвід Бізлі, выступаючы на віртуальным пасяджэнні Рады Бяспекі.
Паводле яго, каронавірус уяўляе не толькі глабальную пагрозу здароўю людзей, але і глабальную гуманітарную катастрофу.
Прадстаўнік ААН мяркуе, што мільёны грамадзянскіх асобаў, якія жывуць у зоне канфліктаў, могуць апынуцца на мяжы галадання.
Бізлі адзначыў, што кожны дзень 821 млн чалавек засынаюць галоднымі або хранічна галоднымі. Яшчэ 135 млн зараз могуць сутыкнуцца з крытычным узроўнем голаду.
«Цяпер праз каронавірус яшчэ 130 млн могуць апынуцца на мяжы галадання ў 2020 годзе. Гэта значыць, агулам 265 млн чалавек», – дадаў прадстаўнік ААН.
Пры горшым развіцці падзей з голадам сутыкнуцца каля 30 краін, падкрэсліў Бізлі.
Нагадаем, што міністр замежных справаў Японіі Тосіміцу Мотэгі назваў крызіс, які здарыўся ў свеце праз пандэмію COVID-19, найвялікшым з часу Другой сусветнай вайны.
МГ belsat.eu
