Сёння, 25 студзеня, у Менску праходзіць суд над YouTube-блогерам Паўлам Спірыным. Наш карэспандэнт сочыць за паседжаннем.
17:08 У судовым пасяджэнні абвешчаны перапынак. Пасяджэнне працягнецца заўтра, 26 студзеня ў 10:00.
Спірын сваю віну не прызнае і спасылаецца на закон, які дае права на крытыку. Сваю асноўную прамову Павел зачытвае з сшытка, які прынёс з сабой.
15:30 Зараз у судзе паказваюць другі фільм Паўла «Грань». Менавіта за гэтыя фільмы блогера абвінавачваюць у распальванні расавай, нацыянальнай, рэлігійнай альбо іншай сацыяльнай варожасці або розні.
12:55 У адказ на пытанне, з якіх крыніцаў паступіла інфармацыя пра афіцыйную статыстыку спальвання трупаў у крэматорыі, пра лёс сына генеральнага пракурора Канюка і ці правяраў ён гэтую інфармацыю, Спірын падняў асобнік газеты «Советская Белоруссия» і сказаў, што ў выданні некаторыя артыкулы наконт БЧБ-сімволікі ўзятыя з успамінаў безыменных людзей, але да іх няма прэтэнзіяў з боку пракуратуры. Між тым наклад газеты – каля 300 тысяч.
На паседжанні ўключылі фільм «Жудасная таямніца генпракурора Беларусі і карт-бланш на садызм», дзе Спірын распавядае, як у 2004 годзе генеральны пракурор Аляксандр Канюк давёў свайго сына да самагубства, але пакараны за гэта не быў.
10:50 Пракурор запярэчыў хадайніцтву, аднак суддзя задаволіла. Заяўленых сведак дапытаюць пасля таго, як высветляць, у якім менавіта СІЗА іх утрымливаюць. Але пісьмовыя паказанні былога настаўніка Паўла Аўчарова аб дзеяннях амапаўцаў далучыць да справы суддзя адмовілася.
10:35 Павел папрасіў дапытаць сведак пра дзеянні АМАП: Васіля Бірмача, Віталя Шышлава і Паўла Аўчарова, які бачыў, як амапавец пырнуў нажом чалавека, які не супраціўляўся. Сведкі застаюцца ў СІЗА, акрамя Бірмача.
Людзі шчыльна сядзяць у судовай зале. Яшчэ некалькі дзясяткаў чалавек, якім не хапіла месца ў зале, чакаюць на калідоры.
На пачатку судовага паседжання Павел сказаў, што адмаўляецца ад адваката, бо лічыць, што ні адзін адвакат у гэтым працэсе не можа яму дапамагчы. Таксама ён сказаў, што не давярае дзяржабвінаваўцу, бо ў пракурорскага прадстаўніка недастаткова кваліфікацыі.
Паўла затрымалі 4 верасня ў межах справы паводле ч. 1 арт. 130 Крымінальнага кодэксу («Наўмысныя дзеянні, накіраваныя на ўзбуджэнне расавай, нацыянальнай, рэлігійнай альбо іншай сацыяльнай варожасці або розні па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці»).
Справа звязаная з фільмам Спірына «Грань» аб наркагандлі ў Беларусі, які быў унесены ў спіс экстрэмісцкіх матэрыялаў. Вядзе справу цэнтральны апарат Следчага камітэту.
У 2020 годзе блогер Павел Спірын збіраўся ўдзельнічаць у прэзідэнцкіх выбарах, аднак Цэнтрвыбаркам не зарэгістраваў ініцыятыўнай групы для збору подпісаў за ягонае вылучэнне. Пасля Павел быў даверанай асобай кандыдаткі на прэзідэнцтва Святланы Ціханоўскай.
АД, belsat.eu