У Магілёве грамадзяне, нязгодныя з павышэннем цэн на аўтамабільнае паліва, збіраюцца пратэставаць штосуботы, каб прыцягнуць увагу да праблемы.
Пра гэта belsat.eu распавёў адзін з актывістаў Уладзімір Крыт.
Першая такая акцыя адбылася ўчора ля гандлёвага цэнтру «Е-сіці» ў Магілёве.
«Нас сабралася прыкладна чалавек дваццаць. Гэта звычайныя аўтааматары, якія маюць свае машыны. Шмат у каго ёсць сем’і, дзеці, і яны не могуць сабе дазволіць плаціць больш за паліва. Спачатку на нас не звярталі ўвагі, але потым мы заўважылі, што побач стаяць тры аўтамабілі і з іх вядзецца здымка», – распавёў магілёвец.
Верагодна, здымала пратэстоўцаў міліцыя. Заяву на правядзенне акцыі яны ў гарадскі выканкам не падавалі і пакуль не будуць.
«Мы не збіраемся рабіць нічога супрацьзаконнага, перакрываць дарогі, напрыклад. Мы проста будзем паказваць астатнім людзям, што мы ёсць і мы супраць. На знак падтрымкі кожны можа прывязаць сабе да машыны чырвоную стужачку», – дадаў Уладзімір.
Паводле яго, акцыі ў іншых гарадах пакуль не чакаюцца. Удзельнікі суботняга пратэсту папярэдне дамовіліся сабрацца на тым жа месцы праз тыдзень і надалей ладзіць акцыі кожную суботу.
Апошнія некалькі гадоў цэны на бензін пастаянна павышаюцца. Апошні раз паліва падаражэла 2 лютага – яшчэ на 1 капейку. Гэта ўжо пятае павышэнне з пачатку года.
КА belsat.eu
