Сёння Аляксандр Лукашэнка ўзгадніў кандыдатуру новага кіраўніка прадпрыемства «Горадня Азот». Кіраваць кампаніяй, якая летась адзначылася страйкамі, будзе былы віцэ-прэм’ер Ігар Ляшэнка, паведамляе БелТА.
«Гэта вельмі важнае прадпрыемства, стратэгічнае. Мы шмат казалі, што ніякіх хістанняў там быць не можа, бо не дай бог што здарыцца – зараза накрые ўсю Горадню. Таму там мае быць «жэстачайшая» дысцыпліна. Не толькі тэхналагічная, але і ў арганізацыйным плане. Вазьміцеся за гэта», – запатрабаваў Лукашэнка.
Ляшэнка некалькі гадоў узначальваў «Белнафтахім». У жніўні 2018-га ён стаў віцэ-прэмʼерам ва ўрадзе Сяргея Румаса. З траўня 2020-га кіраваў прадстаўніцтвам «Гомельтранснафта Дружба» ў Менску.
Раней «Горадня Азот» узначальваў Ігар Бобыр. У час яго кіравання рабочыя заводу далучыліся да агульнанацыянальнага страйку. Летась, 26 кастрычніка, каля 150 работнікаў сабралася ля КПП, аднак больш за 50 з іх затрымалі. Пасля страйкоўцаў пачалі звальняць і замяняць людзьмі з «Нафтану» ды іншых прадпрыемстваў. Цяпер 13 звольненых рабочых судзяцца з заводам.
ЯП, belsat.eu