Нягледзячы на тое, што ў адным з дзіцячых садкоў Менску знайшлі каронавірус, установа працягвае працаваць.
Пра тое, што ў дзіцячым садку № 455, што на праспекце Газеты «Звязда» 12 выяўлены каронавірус у выхавальніцы, карэспандэнтам belsat.eu паведамілі чытачы. Паводле суразмоўцы, нягледзячы на гэта, садок працягвае працаваць. Там запланаваная толькі дэзынфекцыя.
Мы звярнуліся па каментар у садок. Там нам спачатку пацвердзілі, што выпадак каронавіруса ў выхавальніцы фіксаваўся і што садок дагэтуль працуе.
Але затым да тэлефона падбегла жанчына, якая сказала, што садок не дае ніякай інфармацыі ды паклала слухаўку.
Прыводзім тэкставы запіс размовы:
«Паводле нашай інфармацыі, у вашым садку зарэгістраваны выпадак каронавіруса»
«Ну быў такі»
«У выхавальніцы, так?»
«Так»
«Але ці працягвае садок працаваць?»
«Ну так, функцыянуе»
«Алё. Ніякай інфармацыі, нічога не даем»
Аўдыёзапіс размовы ёсць у распараджэнні belsat.eu.
МГ belsat.eu
