У Беларусі з 1 красавіка павялічваецца базавая арэндная велічыня. Такое рашэнне ўлады краіны прынялі, нягледзячы на просьбы ўвесці падатковыя канікулы для бізнесу на час крызісу.
Пастановай Савету Міністраў ад 20 сакавіка № 162 базавая арэндная велічыня павялічылася да 17 руб. 85 кап., паведамілі ва ўрадзе. Рост складзе 95 кап., або 5,6 %.
Базавая арэндная велічыня ўжываецца пры разліках арэнднай платы пры арэндзе плошчаў, якія знаходзяцца ў дзяржаўнай уласнасці. Гэта датычыць таксама ўласнасці гаспадарчых таварыстваў, у статутных фондах якіх больш за 50 % акцыяй знаходзіцца ва ўласнасці Беларусі або яе адміністрацыйна-тэрытарыяльных адзінак, а таксама капітальных пабудоў (будынкаў, збудаванняў), ізаляваных памяшканнях, машына-месцаў, іх частак, уключаючы капітальныя пабудовы (будынкі, збудаванні), ізаляваныя памяшканні, іх часткі на рынках і ў гандлёвых цэнтрах.
Між тым 16 сакавіка Рэспубліканская канфедэрацыя прадпрымальніцтва скіравала прэм’ер-міністру Сяргею Румасу ды кіраўніку прэзідэнцкай Адміністрацыі Ігару Сяргеенку ліст з просьбай увесці захады для падтрымання бізнесу ва ўмовах страты прыбыткаў і кліентаў з прычыны выкліканага каронавірусам крызісу. Зварот у Facebook апублікаваў старшыня канферэнцыі Уладзімір Карагін.
https://www.facebook.com/V.Karyagin/posts/3098252613519911
У прыватнасці, у лісце кажацца пра неабходнасць замарозіць аплату арэнды і перанесці на 1-2 гады аплату падаткаў, штрафаў, пені ды ўнёскаў у Фонд сацыяльнай абароны насельніцтва.
Таксама на сайце petitions.by была апублікаваная петыцыя з просьбай знізіць падатковыя ды арэндныя стаўкі, скасаваць пені, штрафы і адказнасць за нясвоечасовую аплату падаткаў, рэструктурызаваць выдадзеныя юрасобам ды ІП крэдыты.
Таксама ад уладаў прасілі «падрыхтаваць праграмы дзяржаўнага падтрымання прадпрымальнікаў, якія наўпрост нясуць страты ў сувязі з эпідэміяй каронавіруса (грашовага і неграшовага характару)».
Петыцыю ўжо падпісалі больш за 2 тыс. чалавек.
МГ belsat.eu