Расейскія войскі ў Беларусі заварушыліся. Што яны ў нас робяць?
Толькі пачаліся сумесныя з расейцамі авіяцыйныя вучэнні ў Беларусі, а ўжо загарэўся расейскі самалёт, здольны несці ракеты «Кінжал». Што расейскія войскі робяць у Беларусі? Асаблівая актыўнасць назіраецца на лунінецкім аэрадроме. Там у звышсакрэтных абставінах дарабляюць рамонт для ўтульнага побыту расейскіх вайскоўцаў. Варта адзначыць, што менавіта з гэтай пляцоўкі ў лютым паляцелі адныя з першых ракетаў у бок Украіны. Дык чаму, амаль год пасля, ізноў заварушыліся? І што ў гэты момант адбываецца на зямлі? Разбіралася Надзея Бельская.
Не можаш паехаць абараняць Украіну ад расейскай агрэсіі – стань валанцёрам, дапамагай чым можаш, збірай грошы, рамантуй пікапы. Паводле такога прынцыпу дзейнічаюць актывісты польскай фундацыі «Закрэс». Яны падтрымліваюць не толькі ўкраінцаў, але і беларускіх добраахвотнікаў з палка Кастуся Каліноўскага. Госць «ПраСвету» Антоні Гівойна, паляк, які паходзіць з Беларусі, але жыве на Захадзе.
Далучыцца да збору на зімовую вопратку для ваяроў Палка Каліноўскага
Упершыню за трыццаць гадоў Беларусь рэпрэзентаваная на Сусветным эканамічным форуме. Святлана Ціханоўская са сваёй камандаю наведала форум у Давосе, што ў Швейцарыі. Гэта падзея, якой няма альтэрнатывы ў свеце. Лідары дзяржаваў і прадстаўнікі бізнесу сустракаюцца тут у нефармальнай атмасферы, каб абмеркаваць глабальныя праблемы. Беларусь не існавала для іх з пачатку 1990-ых, такая сабе чорная дзірка на мапе. Аднак цяпер нас заўважылі. Што змянілася? Чаму беларускую дэлегацыю запрасілі на форум менавіта сёлета і якія канкрэтныя вынікі можа прынесці візіт беларусаў у Давос?
Украіна выкарыстоўвае тактыку сучаснага заходняга бліцкрыгу і адначасова пазіцыйную вайну. Для вялікага контрнаступу тэрмінова, самае позняе да траўня, трэба шмат заходніх сучасных танкаў, а не тыя некалькі дзясяткаў, якія адпраўляюць туды сёння. Так лічыць прафесар Люк Дэ Вос, ваенны гісторык, падпалкоўнік Каралеўскіх узброеных сілаў Бельгіі ў адстаўцы. «Прафесар Вайна», як яго часта называюць, у інтэрв’ю Алесю Сілічу падзяліўся разважаннямі пра тое, калі рэальна Украіна будзе гатовая да вялікага контрнаступу, а таксама ацаніў магчымасць вызвалення Крыму. Падрабязнасці – у інтэрв’ю з Бруселю.
Уладзімір Пуцін увязаўся ў гонку ўзбраенняў з Украінай. Украінцаў падтрымлівае кааліцыя пяцідзесяці дзяржаваў рамштайнскага фармату, а Расею – Беларусь ды Іран. Што зробіць Крэмль цяпер, калі страты расейцаў пад Салядарам і Бахмутам могуць даходзіць да 20 тысячаў? Замест таго, каб залізваць раны, Пуцін мяняе камандуючага ўварваннем ва Украіну і ставіць задачу генералам узяць Данбас да канца сакавіка. Шайгу рыхтуецца да другой хвалі мабілізацыі, і ўжо называюць колькасць – 500 тысяч «мобікаў». На гэтым апетыты расейскіх вайскоўцаў не заканчваюцца. Міністр абароны Расеі абвесціў пра вялікую рэформу расейскага войска. Наколькі ўсё гэта рэальна? Разбіралася Вольга Міцкевіч.
Міжнародны тэлечасопіс «ПраСвет» з Сяргеем Пелясою глядзіце шточацвер а 21:30. Падпісвайцеся на «Прасвет» у профілю на Facebook ! Глядзіце нас праз спадарожнік «Астра 4A» (ранейшая назва «Sirius 4»), онлайн, на YouTube-канале і на нашай старонцы.
