У новай праграме «Шчыра кажучы» з Арынаю Маліноўскай гаворка пойдзе пра шляхі ўзбагачэння беларускіх чыноўнікаў. Што трымае іх каля рэжыму – і колькі каштуе іхная любоў да Лукашэнкі?
Кіберпартызаны злілі аўтарам праграмы заробкі беларускіх чыноўнікаў. Гэтак, былая старшыня Цэнтральнай выбарчай камісіі Лідзія Ярмошына афіцыйна атрымлівала каля $ 17 тысяч на год, самая вялікая сума была за 2008 год – больш за $ 24 тысячы, або $ 2 тысяч долараў штомесяц. Ва ўласнасці Ярмошынай – дом у Драздах плошчаю 270 квадратных метраў.
Сама экс-старшыня Цэнтрвыбаркаму прызналася ў інтэрв’ю, што набыла жытло за $ 300 тысячаў. Паводле нашых самых грубых падлікаў, збіраць гэтыя грошы Ярмошынай давялося б мінімум 12 з паловаю гадоў, пры гэтым цалкам адкладаючы заробак. Але сваю пасаду яна займала з 1996 года. Сама яна казала, што каб набыць дом у Драздах, прадала кватэру, а таксама пазычыла грошы ў заможных сябровак.
Ігар Карпенка на пасадзе намесніка старшыні Менскага гарадскога выканаўчага камітэту зарабляў каля $ 600 на месяц, а на пасадзе намесніка старшыні Пастаяннай камісіі міжнародных справаў і сувязяў – каля $ 1,5 тысячы. Дзейны міністр спорту Сяргей Кавальчук у 2019 годзе штомесяц атрымліваў больш за $ 1 тысячу долараў.
Адна з самых набліжаных да Лукашэнкі асобаў – ягоная прэс-сакратарка Наталля Эйсмант. Ейны заробак – больш за $ 2 тысячы на месяц.
Экс-старшыня Парку высокіх тэхналогіяў Валерый Цапкала, госць праграмы, распавядае пра «рэзервавы фонд прэзідэнта»:
«Магчыма, такім давераным асобам яшчэ і ёсць нейкая дадатковая каса, з якой яны атрымліваюць грошы. Гэтая каса называецца «рэзервавы фонд прэзідэнта». Туды дзяржпрадпрыемствы дастаўляюць увесь прыбытак, што яны маюць з нафты, гандлю нафтаю, гандлю драўнінай, калійнымі ўгнаеннямі. То бок, гэта паступае ў ягоны фонд […]».
Таксама ў праграме:
– Былая журналістка дзяржаўнага тэлеканалу прызналася, што дзейны міністр дамагаўся яе, а сам заняў высокую пасаду, ажаніўшыся з дачкою Лукашэнкавага сябра.
– Як трапіла ва ўладу Наталля Качанава, і хто дапамог ёй рухацца па кар’ернай лесвіцы?
– Хто, урэшце, падарыў Лукашэнку «Тэслу»?
Праграма «Шчыра кажучы» выходзіць штосераду а 19:05 у эфіры «Белсату», а таксама на нашым YouTube-канале.
Фота: president.gov.by
