Нацыянальнага беларускага павільёну на Венецыянскім біенале гэтым разам не будзе – так пастанавіла Міністэрства культуры. Мастак і куратар Андрэй Дурэйка лічыць, што без прысутнасці на мапе мастацкай Беларусі можа не застацца і на мапе палітычнай.
А на кінафестывалі «Сандэнс» у Солт-Лэйк-Сіці адбылася прэм’ера дакументальнага фільму «Навальны» пра расейскага апазіцыйнага палітыка Аляксея Навальнага, якога ўжо больш за год трымаюць у расейскай турме.
Тым часам ініцыятыва «VEHA» збірае чарговую калекцыю фатаграфіяў з нашых сямейных архіваў. Гэтым разам чакаюцца здымкі людзей у кантакце з прыродаю. Кожны можа паўдзельнічаць у зборы альбо нават трапіць у кнігу, куды будзе адабранае найцікавейшае. Інфармацыю можна знайсці на сайце праекту veha.by.
А Вольны хор працуе над сваім ужо трэцім альбомам «Песні вольных людзей». Прэзентаваць яго мяркуецца на Дзень Волі, 25 сакавіка. Распытваем пра альбом і заклікаем падтрымаць каманду на адмысловай пляцоўцы.
Фота вокладкі: veha.by
