З такім меркаваннем у эфіры «Белсату» падзяліўся Аляксандр Бухвостаў, старшыня свабоднага прафсаюзу металістаў, падчас размовы пра вымушаны адпачынак 90 % працаўнікоў «Гомсельмашу».
Расея знізіла спажыванне, а Захад прадукцыю «Гомсельмаша» ніколі не набываў. Раней «Гомсельмаш» працаваў заўсёды паводле дзяржаўнай дамовы: ён рабіў прадукцыю, атрымоўваў ад дзяржавы субсідыі, а спажыўцы потым расплачваліся з дзяржавай. Цяпер такая схема ўжо не працуе. Спажыўцы хочуць набываць якасныя і стылёвыя камбайны.
Я даўно казаў, што беларуская прамысловасць даўно прайшла пункт невяртання. Беларускія прадпрыемствы пачалі занікаць даўно, гэта звязана з кіраўніцтвам краіны да прамысловасці, якую яны загналі сваймі дырэктывамі, усё заскладзіравалі, зваротныя сродкі змарнавалі. Цяпер натуральным чынам прадпрыемствы спыняюцца – перспектывы ў іх няма, яны ніколі не будуць працаваць так, як раней.
Улады баяцца пратэстаў працоўных: яны памятаюць, як рабочыя страйкавалі 25 гадоў таму. (Сёлета як раз – гадавіна масавага выступлення працоўных у 1991 годзе.) Таму на найбуйнейшых прадпрыемствах улады стараюцца нівеляваць такія працэсы, дзесьці штосьці кампенсаваць – дзяржаўная сістэма падаўлення працуе на поўную моц, у тым ліку і дзяржаўныя прафсаюзы. Яны ж не ініцыююць пратэст, яны гасяць незадавальненне. Спрабуюць прэвентыўна згуляць на магчымым узнікненні пратэстаў.