Еўрапейскі банк рэканструкцыі і развіцця апублікаваў справаздачу з несуцяшальнымі для нашае краіны прагнозамі.
Ажно на 5 адсоткаў абваляцца паказнікі валавога ўнутранага прадукту ў Беларусі яшчэ сёлета. Рост жа, паводле чаканняў Еўрапейскага банку рэканструкцыі і развіцця, адновіцца толькі налета і складзе да трох з паловаю адсоткаў. Што да краінаў рэгіёну, то прагнозы для іх нашмат лепшыя: сёлетняе падзенне там чакаецца ў сярэднім на тры з паловаю адсоткі, а рост налета мае скласці амаль да пяці адсоткаў.
Беларуская асацыяцыя журналістаў распачала збор сродкаў для арыштаваных 11-га і 12-га траўня журналістаў – Міхася Аршынскага, Аляксандра Буракова, Алеся Асіпцова і Змітра Лупача – нібыта за ўдзел у несанкцыянаваных акцыях. Неадкладна вызваліць нашых калегаў заклікаў улады краіны і прадстаўнік АБСЕ ў пытаннях свабоды медыяў Арлем Дэзір.
Зіма на момант вяртаецца ў Беларусь. Наўздагон снегападам сёння ўначы на большай частцы тэрыторыі нашае краіны чакаюцца замаразкі, нават да чатырох градусаў ніжэй за нуль. У чацвер кароткатэрміновыя дажджы месцамі, найперш у паўночных рэгіёнах, зменяць мокры снег.
Пішыце нам: BELSAT@GMAIL.COM
