Лукашэнка падпісаў указ № 70, які карэктуе ранейшы дакумент аб правілах бяспекі ў эксплуатацыі Астравецкай АЭС. У новай рэдакцыі ўпаўнаважаныя дзяржаўныя органы атрымаюць права ажыццяўляць кантроль радыеактыўнага забруджання БЕЗ ліцэнзіі.
Больш за тое, прадугледжваюцца грамадскія слуханні аб пытаннях бяспекі АЭС. З чым звязаныя гэткія захады? Пытанні адрасуем фізіку-ядравіку Андрэю Ажароўскаму на сувязі з Масквы:
«Указ нічога канкрэтнага не пастанаўляе. Хацелася б, каб праводзілася грамадскае абмеркаванне па ўсіх аб’ектах, якія будуць будавацца. А цяпер АЭС, у той сітуацыі, у якой яна заказаная ў «Росатома», яна непаўнавартасная. Там няма абʼектаў па захоўванні адпрацаванага ядравага паліва, дакладней ёсць, але не ўсе. Вось гэта і павінна быць спачатку нейкім чынам адпрацавана, потым пабудавана, і дзесьці ў гэтым працэсе яшчэ праведзеныя грамадскія слуханні. Паглядзім, як будуць улады з усяго гэтага выходзіць. […] Я думаю, што зʼяўленне гэтага ўказу звязана з тым, што праблема радыеактыўных адкідаў і адпрацаванага ядравага паліва не вырашаная».
А ці баіцеся вы запуску атамнай электрастанцыі ў Астраўцы? І калі так ці не, дык чаму? Паслухаем адказы жыхароў сталіцы.
