25 год таму, 20 верасня 1991 году, Вярхоўны Савет прыняў пастанову «Аб стварэнні Узброеных Сілаў Рэспублікі Беларусь». Якое яно, беларускае войска, цяпер? Наколькі патрыятычнае і баяздольнае зважаючы на вонкавыя пагрозы нашай незалежнасці?
Вайсковы аглядальнік Андрэй Паротнікаў заўважае, што той факт, што многія беларускія вайскоўцы пачыналі служыць яшчэ ў СССР, не азначае іхнай стоадсоткавай прарасейскасці. На ягоную думку, праблема – у іншым.
«Якраз на ўзроўні палкоўнікаў і вышэй людзі адэкватна разумеюць сітуацыю, бо, прабачце, не так шмат дурняў сярод палкоўнікаў і яшчэ менш дурняў-генералаў. Дзве-тры вышэйшыя адукацыі адбіваюцца. У нас маецца праблема з ніжэйшым афіцэрскім складам. Гэта людзі, якія жывуць у расейскай інфармацыйнай прасторы – глядзяць расейскае тэлебачанне і чытаюць расейскія сайты. З большага не ведаюць ніякіх моваў, апрача расейскай. Таму яны ўспрымаюць крамлёўскую прапаганду даволі масава».
Да ўсяго, яны бачаць, што ўлады Беларусі спрабуюць гуляцца з Захадам і Украінай, а з другога боку чуюць тую самую хаўрусніцкую рыторыку датычна Расеі. Таму гэтыя афіцэры, якія «прывыклі ўспрымаць рэчаіснасць канкрэтна і наўпростава», дэзарыентаваныя.
