Госць «Размовы« з Уладзімірам Мацкевічам, ІТ-кансультант і фігурант гучнай справы аб экстрэмізме Глеб Рубанаў шукае адказ на пытанне, што больш нагадваюць дзеянні ўладаў: сапраўдную барацьбу за спакой краіны ці змаганне з іншадумцамі.
ІТ-кансультант Глеб Рубанаў трапіў у непрыемнасці праз фотаздымак у сацсетках. Няўжо ён уяўляе такую вялікую небяспеку для ўладаў, здзіўляецца вядоўца «Размовы» Уладзімір Мацкевіч. Няўжо няма больш небяспечных асобаў для рэжыму?
«Праз дваццаць гадоў аўтарытарызму мне падаецца, сістэма збудаваная такім чынам, што назваць самага небяспечнага для яе чалавека немагчыма, – адказвае госць праграмы. – Бо лідары супраціву, нават нейкія патэнцыйныя, адсякаюцца яшчэ на далёкіх подступах».
Пры гэтым Глеб Рубанаў падкрэсліў, што ён, хутчэй, дысідэнт, чым актывіст, і трапіў пад ціск праваахоўнікаў выпадкова. Бо махавік раскручаны, а для працы праваахоўных структураў патрэбнае паліва. У гэтым выпадку паліва – гэта нязгодныя з уладамі людзі.
