Польская памежная служба паведаміла, што ад пачатку года 5,5 тысячы мігрантаў спрабавалі трапіць у краіну з Беларусі. Амаль усе замежнікі едуць транзітам праз Расею, піша агенцтва PAP са спасылкаю на прэс-службу ведамства.
Памежная служба Польшчы канстатуе, што з надыходам вясны стала болей спробаў мігрантаў трапіць з тэрыторыі Беларусі з парушэннем мяжы:
«Штодзень больш за сотню замежнікаў спрабуюць нелегальна перасекчы польска-беларускую мяжу. Вядома, гэта яшчэ не столькі, як у 2021 годзе, калі такіх спробаў было 800 за дзень».
У ведамстве прагназуюць, што лік мігрантаў вырасце яшчэ, але запэўніваюць: да гэтага гатовыя.
«У нас вялікі досвед, акрамя таго, мяжа абароненая фізічнай і радыёэлектроннай загародай», – адзначылі ў Памежнай службе.
Ад леташняга студзеня да канца сакавіка зафіксавана 5,5 тысячы спробаў мігрантаў трапіць з Беларусі ў Польшчу ў абыход пунктаў пропуску. Затрыманыя 210 асобаў, астатніх не пусцілі. Яны або самастойна вярнуліся, пабачыўшы польскія патрулі, або «былі адразу спыненыя на мяжы і вернутыя на ейную лінію».
«Краіны, адкуль прыязджаюць мігранты, розныя. Два гады таму гэта былі ў асноўным Ірак, Афганістан, Сірыя. Цяпер – Чад, Гана, Емен, Нігерыя, Самалі, Іран, Егіпет», – распавялі ў Памежнай службе Польшчы.
Там падкрэслілі, што амаль усе мігранты едуць да мяжы з Беларуссю транзітам праз Расею:
«Іхныя дакументы і размовы з намі паказваюць, што яны прыляцелі ў Маскву або Санкт-Пецярбург усяго некалькімі днямі раней. Няма людзей, якія ляцелі са сваёй краіны адразу ў Менск».
Міграцыйны крызіс на беларуска-польскай мяжы разгарэўся ў 2021-м, у той год налічылі амаль 40 тысячаў асобаў, што спрабавалі трапіць у ЕЗ з парушэннямі закона. Летась было меней за 16 тысячаў.
Варшава абвінавачвае Менск у арганізацыі нелегальнай міграцыі дзеля дэстабілізацыі рэгіёну. У Беларусі кажуць, што «Еўропа сама паклікала гэтых людзей».
Сяргей Крот belsat.eu