Што ў прынятых «саюзных праграмах» Беларусі і Расеі, па-ранейшаму не вядома дакладна – толькі з ускоснага апісання. Але каб гэтае штосьці выканаць, яшчэ трэба скласці дадатковы план.
Спікер Дзяржаўнай думы Расеі і старшыня «парламенцкага сходу саюзнай дзяржавы» Вячаслаў Валодзін у сваім Telegram-канале расказаў, што для рэалізацыі дамоўленасцей, падпісаных 4 лістапада, «саюзнай дзяржаве» давядзецца прыняць дзясяткі заканадаўчых рашэнняў.
Ды дзеля гэтага трэба яшчэ «абмеркаваць супольныя крокі ў заканадаўчым забеспячэнні рашэнняў» і «выпрацаваць дарожную мапу ўдзелу дэпутатаў у рэалізацыі інтэграцыйных працэсаў».
Да таго ж, пасля нядаўніх выбараў у Дзяржаўную думу Расеі расейскаму боку трэба яшчэ абнавіць дэпутацыю ў парламенцкі сход «саюзнай дзяржавы». Пра гэта будуць размаўляць на паседжанні ў панядзелак і на наступным тыдні абмяркуюць з беларускімі калегамі.
Такім чынам, план працы не быў апісаны ў «дарожных мапах», а весці гэтую працу Расея не спяшаецца.
Што ж у было апісана ў «дарожных мапах», вядома толькі з кароткага апісання ўраду Расеі – і з таго апісання вынікае, што ні пра што канкрэтнае яшчэ няма дамоваў, толькі пагадненні пра нешта дамовіцца ў будучыні. Поўны тэкст дамоваў не публікавалі.
АА belsat.eu
