Абвешчаны збор на станцыі радыёэлектроннай барацьбы для штурмавога ўзводу батальёну «Волат» Палка Каліноўскага. Пра гэта ў сябе ў Facebook напісаў кіраўнік «Маладога фронту» і баец батальёну Дзяніс Урбановіч.
Усяго байцы хочуць сабраць 460 тысячаў грыўняў (11,5 тысячы долараў), атрымалася прыцягнуць ужо больш за палову сумы.
Якое менавіта абсталяванне патрабуецца байцам, не ўдакладняецца, аднак у апошнія месяцы сродкі РЭБ сталі вельмі важнымі для штурмавых дзеянняў, у асноўным яны выкарыстоўваюцца для процідзеяння беспілотнікам.
У красавіку для Палка імя Кастуся Каліноўскага быў арганізаваны збор на 100 беспілотнікаў.
«Дзякуючы папярэдняму збору група закрыла патрэбу ў FPV-дронах і неабходным тэхнічным абсталявання. Цяпер мы ўпэўнена паражаем цэлі на 15 км ад лініі баявога сутыкнення. Але ж можна лепш і больш. Пытанне эфектыўнага выяўлення ворага ўсё яшчэ не закрыта», – адзначылі ў палку.
Сваё падраздзяленне беспілотнікаў каліноўцы назвалі ў гонар пратэстоўцы Мікіты Крыўцова, які загінуў у жніўні 2020 года.
Ася Саковіч belsat.eu
