Полк Каліноўскага арганізаваў эфектыўную аэравыведку за дапамогаю дронаў. Тое, што раней вымагала трох дзён, цяпер робіцца ў жывым эфіры! Каліноўцы, фактычна, вядуць стрымы з расейскіх пазіцыяў, каб аператыўна накрываць агнём выяўленыя цэлі.
Пра тое, наколькі палепшылася праца падраздзялення БПЛА палка Каліноўскага, нам распавёў беларускі добраахвотнік з пазыўным Лыч. Сваё падраздзяленне беспілотнікаў каліноўцы назвалі ў гонар пратэстоўцы Мікіты Крыўцова, які загінуў у жніўні 2020 года. Яго знайшлі павешаным у лесе. У пратэстах удзельнічаў і Лыч. Ён прайшоў праз катаванні на Акрэсціна.
Калі распачаўся набор беларускіх добраахвотнікаў для дапамогі Украіне, Лыч далучыўся да іншых беларусаў, якія захацелі са зброяй у руках даць бой расейскім акупантам. Так ён трапіў у полк Каліноўскага, дзе зрабіўся аператарам дрона-камікадзэ. Але гэта не значыць, што ён пазбег капання акопаў і стралковых баёў – праца аператара зусім не такая бяспечная, як можа падацца на першы погляд. Пра гэта мы падрабязна распавядалі ў адным з папярэдніх выданняў праграмы.
З іншага боку, Лыч кажа, што навічкоў не кідаюць адразу ў агонь бою, а імкнуцца прывучаць да ўмоваў перадавой паступова. Напрыклад, ён жартаўліва згадвае, як трапіў пад расейскі абстрэл, калі яму выпала капаць акопы для мінамётнікаў за некалькі кіламетраў ад лініі баявога сутыкнення.
«Спачатку я капаў акоп даволі павольна і «без энтузіязму». Але пасля тых прылётаў за 200 метраў ад нас прыйшлося паскорыцца праз нежадання патрапіць пад абстрэл», – іранізуе Лыч.
Поўная размова з беларускім ваяром – у нашай праграме.
Праграму «Ваяры» глядзіце кожную нядзелю на тэлеканале «Белсат» праз спадарожнік «Астра 4A» (ранейшая назва – «Sirius4»), онлайн, у закладцы «Праграмы» на нашай старонцы або на канале YouTube.
Калаж з фота: Полк Каліноўскага /Facebook; Сили оборони півдня України / Telegram
