Ірыну Дрыгу знялі з пасады начальніцай Галоўнага ўпраўлення дзяржаўных спецыяльных культурных мерапрыемстваў і прафесійнага мастацтва 16 лістапада. Пра гэта паведамляе «Наша Ніва» са спасылкай на крыніцы ў сістэме культуры.
Цяпер замест Дрыгі – Кацярына Усава. Раней яна працавала дырэктаркай у Менскім гарадскім палацы культуры.
«Апошнім часам Ірына Дрыга перастала з’яўляцца на канцэртах разам з міністрам, хаця яны заўсёды хадзілі парачкай. Гэта даволі дзіўна. Яна трымала ў страху ўвесь Мінкульт, усе яе баяліся, бо не дапускала «нядобранадзейных» артыстаў да працы. Тым не менш, некаторыя арганізацыі выпускалі незаменныя кадры, што справакавала шэраг скандалаў асабіста з Дрыгай.
Яна не проста звальняла артыстаў, а яшчэ і тэлефанавала на іншыя іх месцы працы, куды яны ўладкаваліся. Казала, маўляў, гэты чалавек не павінен у вас працаваць. Гэтага можна было і не рабіць, але яна перавыконвала план», – кажа крыніца «Нашай Нівы».
Цяпер Дрыга стала кіраўніцай аддзелу па кінематаграфіі. Гэта «ганебнае паніжэнне», лічыць суразмоўца выдання, бо ніякага беларускага кіно цяпер няма:
«Яна была на самым версе, а цяпер не вырашае нічога».
Ірына Дрыга расказвала на дзяржТБ, якія артысты могуць мець магчымасць выступаць на дзяржаўных пляцоўках у Беларусі, а якія – не. Галоўнае патрабаванне – яснае выражэнне прыхільнасці да рэжыму Лукашэнкі. Як распавядаў кіраўнік НАУ Павел Латушка, менавіта Дрыга складала «чорныя спісы» артыстаў.
Таксама яна выступала за скарачэнне ахоўных межаў Курапатаў – месца масавага пахавання і расстрэлаў рэпрэсаваных у СССР.
Было супрацьстаянне ў Дрыгі і з прарасейскай актывісткай Вольгай Бондаравай. Тая была незадаволеная, што Дрыга не дазваляла выступаць сапраўдным патрыётам.
Арсен Рудэнка belsat.eu
