Турэмныя муры і краты – каханню не перашкода. Надоечы беларусы сталіся сведкамі гісторыі кахання Валерыя і Яны. Маладыя людзі пабраліся шлюбам у калоніі.
Валерый і Яна пазнаёміліся летам 2020-га. Толькі пачалі сябраваць – і дзяўчыну затрымалі за палітыку.
Яну і яшчэ 11 чалавек абвінавацілі ў тым, што яны нібыта былі арганізатарамі студэнцкіх пратэстаў. Валерый быў на кожным судовым паседжанні і лічыць абвінавачанні лухтою. Як жа балюча было хлопцу пачуць вырак для каханай – 2,5 года калоніі.
Калі Яну толькі арыштавалі, пара пачала актыўна ліставацца. Каб патрымаць Валерыя, дзяўчына намалявала комікс «Што рабіць, калі сумна». Ён цяпер перакладзены на розныя мовы і змакетаваны.
Як толькі дзяўчыну пасадзілі, Валерый і Яна вырашылі пабрацца шлюбам. Жаніх узяў прозвішча каханай.
Вяселле атрымалася надзвычай эмацыйным нават для старонніх людзей.
«Я быў такі шчаслівы! І там Яна. Сапраўдная. Хоць і ў бушлаце, канечне, зэкаўскім, але жывая Яна! Мы ж не бачыліся той час, што яна сядзіць», – узгадвае Валерый.
Маладым дазволілі прайсціся разам, трымаючыся за рукі. Гледзячы, як яны развітваюцца, турэмніца не вытрымала і расплакалася. Слёзы пацяклі градам.
«Выйшаў нейкі мужык: «Ты чаго плачаш, што здарылася?» А яна: «Усё. Не чапай мяне. Усё нармалёва», – распавядае Валерый.
Больш за ўсё на свеце Валерый чакае лістапада 2022 года, бо тады Яна мусіць выйсці на волю. Валерый марыць, што людзі адгукнуцца і падаруюць Яне планшэт ці камп’ютар, на якім яна зможа і далей падтрымліваць іншых палітвязняў. Маляваць коміксы, малюнкі.
Падтрымаць Яну і Валерыя можна з любога пункту свету, як публічна, так і ананімна. Лістуйце да нас: belarus2belarus@gmail.com.
I памятайце: беларус беларусу – любоў, падтрымка і перамога!
Далучайцеся да нашых суполак у Facebook ды Instagram.
Дзе мы разам – там і Беларусь.
Праграму «Беларус беларусу» глядзіце на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.
