Непрызнаны рэжым Лукашэнкі дапамагае Расеі ў вайне – а пакутуюць простыя беларусы. У тым ліку тыя, хто змагаўся з гэтым рэжымам і пацярпеў ад яго.
З дыскрымінацыяй і хэйтам пасля пачатку вайны сутыкнуліся дзясяткі тысяч беларусаў: «з Беларусі ляцяць ракеты», «беларусы не бунтуюць супраць вайны», «беларусы – суагрэсары», «беларусам трэба забараніць уезд у Еўропу», «у беларусаў трэба забраць візы».
«Вы з Беларусі, ідзіце і спыняйце танкі!» – такія словы пачула вядоўца «Трэба пагаварыць» Марыя Грыц ад украінца, з якім у Кіеве хавалася ў бамбасховішчы. «Беларусам я гэтага не дарую», – такі каментар атрымала другая вядоўца, Крысціна Дробыш, у той час, калі ў якасці валанцёркі шукала для ўкраінскага войска ахоўны рыштунак.
Беларускія ініцыятывы аднымі з першых разгарнулі дапамогу ўкраінскім уцекачам ды ўкраінскаму войску. Беларусы стварылі вайсковыя падраздзяленні, каб змагацца за Украіну з агрэсарам. Беларусы масава выйшлі на антываенныя пратэсты, нягледзячы на дзікія рэпрэсіі ў Беларусі – аднак дыскрымінацыйны наратыў супраць беларусаў не сціхае.
Госць чарговага выдання «Трэба пагаварыць» – Аляксей Лявончык, актывіст і сузаснавальнік ініцыятывы By_help і фонду «BYSOL», расказаў, як несправядлівы антыбеларускі наратыў змусіў яго збіраць гісторыі дыскрымінацыі беларусаў за мяжой.
Як рэагаваць на дыскрымінацыю? Як адчулі на сабе антыбеларускі хэйт асобныя людзі і агулам беларускае грамадства? Ці мусяць беларусы пачувацца вінаватымі, тым больш тыя беларусы, якія дапамагаюць Украіне? Як не саромецца быць беларусам? Гэтыя тэмы абмяркоўваем у новым выданні ток-шоу «Трэба пагаварыць».
Глядзіце праграму «Трэба пагаварыць» кожную нядзелю ў эфіры «Белсату» а 20:30, на YT-канале «Белсат Life», а таксама ў дадатку для тэлевізараў «Belsat Smart» і смартфонаў на Android і iOS . Далучайцеся да Telegram-каналу праграмы.
