Лукашэнка пад Ашмянамі распавёў пра «Крокус Сіці Хол». Але думкамі быў на Усебеларускім народным сходзе. Ці зменіць УНС рэжым? Чаму Беларусь могуць чакаць аварыя на АЭС, тэракт і нават смерць Лукашэнкі? Усаў і Рудкоўскі, новы «Двубой».
«У Беларусі сфармаваўся жорсткі, нават таталітарны рэжым. Можна яго назваць нават электаральным таталітарызмам, які так ці інакш патрабуе абсалютнай кансалідацыі і мабілізацыі ўсіх структур. І ў гэтай сістэме, канешне ж, ключавую ролю грае правадыр, якім з’яўляецца Лукашэнка. І ўвесь апарат, уся сістэма і рэжым як такі працуюць якраз на ўтрыманне такой канфігурацыі, дзе Лукашэнка застанецца пры ўладзе. Любы сыход, любая ператрансфармацыя цэнтру ўлады, канешне, для такой сістэмы – неататалітарнай, жорсткай, цэнтралізаванай – яна небяспечная. І па персанальных псіхалагічных функцыях мы бачым, што для Лукашэнкі ўлада – гэта ўсё. Сыходзіць ці дзяліцца ўладай ён не збіраецца», – зазначае палітолаг Павел Усаў.
У той жа час Пётр Рудкоўскі лічыць, што УНС – гэта ўсё ж пэўны крок да трансфармацыі рэжыму, як і ператварэнне руху «Белая Русь» у партыю: «Лукашэнка не збіраецца пакідаць пасады, удзелу ва ўладных структурах. Але ўся гэтая гісторыя з Усебеларускім народным сходам паказвае, што гэта для яго запасное месца. І што ён і яго акружэнне ўсур’ёз думаюць пра тое, каб ён сышоў з пасады прэзідэнта».
Аднак найбліжэйшым часам у Беларусі на фоне таго, што разгортваецца ў суседняй РФ, могуць адбыцца падзеі, якія звычайна называюць «чорным лебедзем». Сярод іх палітолагі называюць магчымую аварыю на АЭС, ступень бяспекі якой выклікае заклапочанасць сярод экспертаў; магчымы тэракт, што нясе пагрозу вобразу «выспы стабільнасці», які прадае свайму электарату Лукашэнка; ягоную фізічную смерць. Ці сапраўды гэта магчыма ў Беларусі ў блізкай будучыні?
Глядзіце ў новым выданні праграмы «Двубой» з Віталём Цыганковым.
Госці праграмы:
Праграму «Двубой» глядзіце на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат News» або ў закладцы «Праграмы» на нашай старонцы.